Chaiwala bad showkidar

Bah Monarch Shabong

Ka elekshon ha India, ha kine ki san snem, ka la iaid, da ka jing shim ia ki nuksa kiba rit ba rit suda bad kitei ki kynthup ia ka nuksa jong ki riew sain pyrthei, kum ki nongdie sha lane chaiwala bad mynta pat ka la mih sa ka jingshim kyrteng ialade kum ki showkidar, kaba la ialam da U Narendra Modi, nongialam ka BJP bad kaba la iahap jingmut lang da kiwei pat ki nongialam jong katei ka seng, kiba dei ruh heh jong ka sorkar India.
Kitei ki jingkren, ki dei kiba la leh shongshit bad pynleit jingmut pat, tang ki nongialam jong ka seng BJP, lyngba kitei ki kyrteng sin, katba kiwei pat ki nongialam jong kiwei pat ki seng sain pyrthei, kim shym la kynmaw satia ban jied ialade da ki kyrteng sin, kum ki shaiwala lane ki show kidar, kumba la jied ki BJP.
Kumta ngim sngewthuh ia kaei ka jingmut, ban sin ialade kum ki shaiwala lane ki showkidar, haba ka la don ka kyrteng kum ki member of parliament lane ka Lok Sabbha bad ka Rajya Sabbha, kiba dei ki iing ba khraw tam jong ka synshar paidbah jong ka Ri India bad kumta ngi dei ban hun da kitei ki kyrteng, kiba la pdiang bad ithuh da ka riti synshar ri bad ha kaba ki nongialam ki lah ban tuklar lut ia baroh ki jingeh kiba don ha ka ri bad kam dei satia, tang kaba long nongdie sha lane kaba long showkidar.
Ngim kren hangne, ba ngi pyrshah ne ngi kyrshan ia kano kano ka seng sain pyrthei, hynrei, kaba donkam ka long ba ngi la don la ki jong ki kyrteng, ngi la don la ki jong ki seng sain pyrthei bad ngi donhok ban jied ia la ki jong ki ishu, kiba ngi dei ban leit sha u paidlang jong ka Ri bad ia kiei ki mat kiba ngi sngew dei ban pashat, hynrei ban ia buh noh ialade da ki kyrteng sin, lehse kam da don than ka jingmut bad ki dei ruh tang ki nia pynlut por, hynrei lehse kiba u paidlang ka India, um da sngew don jingmut ban ia tuklar than.
Ngin dang ia peit ia kaei ka mat, kaba u paidlang ka India, un sa jubab hadien ka 23tarik Jymmang 2019, hynrei lehse, ka kyntien shaiwala, kaba mut ka dei ka kam die sha bad uba duk u hap ban trei shitom ban die ia ka sha jongu man la ka sngi bad ka kam chowkidar, ka dei kaba kham eh bad kata ka long ban pahara ia la ki kynrad kiba ai bylla, tangba ngim tip pat la u showkidar, u dei uba ap thap ban ioh vote ne ioh lehse, u dei uba ap ia kiba rben tyngka.