New Delhi: U Amit Shah, myntri kam poh iing ka sorkar India, ula kren shai mynta ka sngi, ba ka Citizenship (Amendment) Bill, kam dei satia kaba pyrshah ia ki rit paid, hynrei ka dei kaba khanglad ia ka jingwan tuid jong ki poiwir kiba namar.
U Amit Shah, ula ong ka Congress, ka la pyn ia phiah ia ka Ri, ha ka nongrim jong ka niam bad kumta, kane ka donkam ban wan rah ia kane ka ain kaba thymmai. Ka Congress, ka la pharia ia ka Ri, ha ka nongrim jong ka niam” ong U Amit Shah.
U myntri, ula ong ba ia ki ain la thaw, na ka bynta ban ai jaka shong jaka sah ia ki briew, ha ki por kiba ladep ruh, kynthup ia kaba la leh ha u snem 1971 hadien ka jingmih ka Ri Bangladesh bad ka jingthombor ia ki nong India ha Uganda. “Ka bill kam ktah satia wat tang .001 percent ia ki rit paidbah. Ka dei ban pyrshah ia ki poiwir kiba wan rung sha ka Ri” ong u Shah.
Ki kynhun liang pyrshah, ba kynthup ia U Adhir Ranjan Chowdhury, Saugata Roy, NK Premchandran, Gaurav Gogoi, Shashi Tharoor, Asaduddin Owaisi bad kiwei ki pyrshah jur ia kane ka bill, hynrei la leit rah ha ka iing lyngba ka jing mynjur jong 293ngut ki MP, katba kiba pyrshah, ki don tang 82ngut.
Phi don ban ong eiei?