Byrthen ujor mukotduma ka CSWO ia ka UCIL lada tih uranium

Shillong 20 Nailur:
Ka CSWO ka la byrthen ba kan ujor da ka mukotduma pyniap briew pyrshah ia ka UCIL (uranium Corporation of India Ltd) lada ka tih uranium jar jar wat hapdeng ka jingpyrshah jong ki paidbah.
Ka President ka CSWO ka Kong Agnes Kharshiing ka la ong ba ka seng ka ieng pyrshah jur ia ka jingthmu tih uranium ka UCIL ka tnad ka sorkar pdeng ha Kylleng -Pyndengsohiong-Mawthabah ka West Khasi Hills district ha kane ka jylla namar ba ka jingtih uranium ka don ka jingma kaba shyrkhei ia ka jingim briew.
“Lada ka UCIL kan iaid bteng ban pynbor ban ioh tih uranium bad ban tih rieh jar jar, ngin ujor da ka mukotduma pyniap briew pyrshah ia ki namar ba ki pyrshang ban pyndap ia ki paibbah da kaba tip. Ki paidbah jong kitei ki thain ba don uranium bad ka jylla ki dei ban tip ia ka jingshisha jong ka jingma na ka jingtih ia u uranium uba ktah ia ka jingkoit jingkhiah jong ki briew bad wanrah jingpang bampong”, la ong ka president ka CSWO ka kong Agnes Kharshiing.
Ka CSWO ka ong ba ka jingim jong ki briew ka don hapdeng ka jingma lada shah ban tih ia u uranium.
“Ka CSWO ka pyrshah jur ia ka jingthmu tih uranium ha ka jylla bad ruh ha ki jaka jong ki riewlum” la ong ka Kong Kharshiing.
U Uranium u dei uba ma bha ia ka jingim jong ki briew bad ka khot ia ki bor synshar shnong ba kin ieng pyrshah ia kane ka jingthmu ka sorkar pdeng ban ailad ban tih uranium.
“Hato ki kwah ban iohi ia ki khun ki kti kin pang bampong ba har rukom? Ki dei ban ialum ia ki paidbah ka shnong ban pynshai paidbah ia ka jingma na u uranium. Ka jingplie ia ka khyndew ka thad rkhing ia ngi ha ka lyer bih. U pui pui jong u uranium u her da ki hajar kilometer ban pynphriang ia ki jingpang”, la ong ka president ka CSWO.
Ka la ong ruh ba ka Khasi Hils Autonomous Ditsrict Council (KHADC) kam dei ban ai lad ia ka jingthmu ka UCIL ban tih uranium.
Ka la ong ba ha u Jymmang 2008, ka Department of Atomic Energy (DAE) ka la khein antad ban ioh khlong ia u uranium haduh  3,75,000 ton na Domiasiat ha West Khasi Hills district. Une u uranium u dei uba bha bad ka jingktah jongu ruh ka khlain bha ia ka jingkoit jingkhiah jong u briew namar ka radiation kaba khlain.
Ka CSWO ka la takrain ia ka sorkar balei kan ap ia ka UCIL ba kan ai surok sha kitei ki thain bad ka dei ka kamram jong ka sorkar ba kan pynpoi surok pynpoi um bam, pynpoi bording, ym ka UCIL kaba thmu ban pyniap ia ki paidbah.