Byrthen U Mukul ba pynsniew dur ki lad pathai khubor ia ka jylla

Shillong, 10 Lber:
U Myntri Rangbah ka jylla u Dr Mukul Sangma u la byrthen tyngeh ia ki lad pathai khu bor ka ri halor ka jing mlien palat jongki ban pynsniew dur ia kane ka thain Dong Mihngi kum ka ktem ki kam riew pyntriem.
Haba kren mynta ka sngi hapoh ka iing dorbar u Myntri Rangbah u la ong ba, “Ka sorkar ka la dei ban thaw noh da ki ain ia ki lad pathai khubor ka ri kiba ju mlien palat ban pynlong ia kane ka Dong Mihngi kum ka ktem ki kam pyntriem”.
“Haba jia eiei kiba bha ha kane ka thain ki lad pathai khubor ka ri, kim ju patiaw eiei ban pyn phriang hynrei ki mlien tang ban pyn phriang ia ki khubor ba sniew jong kane ka thain”, la ong u Dr Sangma.
U la ong, “Nga la iakren bad ka sorkar pdeng ba kan leh eiei ban thaw da ki kyndon ia kane ka jingpynphriang pathar ki lad pathai khubor ia kiba sniew ki bym shisha ia kane ka thain”.
“Nga sngew lyngngoh haba jia ka jingshlei um ha Garo Hills, ki lad pathai khubor ka ri, kim patiaw eiei ban pynmih”, la kynthah u Myntri Rangbah.
Ym tang katta, u Myntri Rangbah u la ong ba kumba long, ki lad pathai khubor ki long pynban kum ki tynghung jong ki kynhun seng lehnoh ha kaba ki la pynheh ia kano kano ka jingjia ban pyntieng ban pynma ia ki briew haduh ba kin sngew triem ban wan kai sha kane ka thain.