Byrthen ki nongniah kali, ban leit sha iing bishar, halor ka khajna ba 50 percent

Shillong: Mynta ka sngi ka 22 tarik u Rymphang 2021, ki nongialam jong ka Meghalaya Joint Action Committee of Commercial Vehicles (MJACCV) ki la ong ba lada ka Sorkar kam map da 50% ia ki khajna kali ha ki bnai ba kine ki nongniah kali kamai, ki khlem ioh ban mih satia sha surok ban kamai na ka jingwan lynshop jong u khlam Covid 19, na ka liang kane ka kynhun kam banse ban leit ujor sha ki bor ba halor bad wat shaduh ka iingbishar ban ioh ia kaei kaba ki dawa kaba long ka hok jong ki.

Haba kren sha ki lad pathai khubor, u Chairman jong kane ka seng, u Bah Wandonbok Jyrwa, u la ong ba wat la ka Sorkar jylla ka la pynhiar ia ka dor jong ka petrol bad diesel da 7 tyngka, hynrei tang kumba katto katne sngi pat ka la pynkiew biang sa 2 tyngka kaba mut ba ka Sorkar hi ka pynhiar dor tang 5 tyngka. Na ka liang ka seng ka kwah ba ka Sorkar kan pynbeit noh mardor ia kane bad ia ka dor bai kali hi ka Joint Action Committee ka la rai ban pyniaid beit shwa katkum ka notification kaba rim.

U Bah Wandonbok u la ong ba lada ki paidbah ki lap ba ki nongniah kali kamai ki shim tam ia ka bai kali jong ki, ki paidbah ki lah ban ujor ia kane mardor ryngkat ki nombar plate kali kaba ki shong.
Shuh shuh u Bah Wandonbok u la ong ruh,”Na ka liang ka Sorkar lada kam map ia ki khajna jong ki kot kali, te ngim banse ban hap leit noh pat sha ki bor jong ka aiñ, ki bor kiba kham halor shuh shuh jong ka Sorkar namar kumno ngin siew khajna ha ki sngi kiba ngi khlem ioh iaid. Ngim banse ban pynsngew ia kane ruh sha ka Commission of Human Rights namar ba ki la long kumba ki iuhroit ia kaei kaei kaba ngim lah ban leh. Katto ngi mad ia ki jingeh hapdeng ki lockdown hynrei ka Sorkar pat ka kyntu pynban ban hap siew 100% ka khajna bad hapdeng ka jingiakhih ruh ka Sorkar ka pynkiew pat ia ki khajna ki bapher bapher myn ha ka 3 tarik u Rymphang 2021.”

Ka seng ka ong ruh ba kan sa shong pyrkhat shwa ba lano namarba ka jingmap na ka bynta ka phaiñ ia ki kot kali ruh kam shym la dei na ka map na ka liang ka sorkar jylla hynrei la map na ka liang ka Sorkar Pdeng haduh ka 31 tarik u Lber 2021 bad na ka liang ka seng kan ialeh pynsted noh kumno ban leh eiei hashwa kane ka tarik.