Shillong: Ka MLA jong ka Congress party ka Dr Ampareen Lyngdoh, ka la ong ba na ka liang jong ka, ka kyrshan ia kane ka jingiakhih jong ki nongniah kali bad ia kane ka mat kan sa rah ha khmat ka ingdorbar thawain ban ia said halor kane.
Ka Dr Ampareen ka la ong ba ka sorkar kam dei ban sngap mynthi halor ka jingiakhih ki nongniah kali, hynrei ka dei ban jubab ia ka daw ba ka pynkiew ia ka dor Petrol bad Diesel ha ka jylla.
Ka Dr Lyngdoh ka la ong “Ngi kum u paidbah ngi don ia ka hok ban tip ia ka daw ba ka sorkar ka pynkiew ia ka dor petrol bad diesel bad lada nga kum ka MLA ngam tip balei ki pynkiew u paidbah shaei un tip.”
“Lada ka sorkar ka sngewdei ban lum khajna, ka dei ban pynshai ruh ia ka daw ba ka pynkiew, kum ba ngi iohi ba ka jylla Assam ka la pynhiar haduh 5 tyngka bad ngi dei u paidbah u ba kwah ban tip balei ka sorkar ka pynkiew ia ka dor umphniang” ka la ong.
Ka la ong ruh ha ka jinglong MLA jong ka, kam shem pat iohi ban don kum kane ka jingjia ha kaba ki nongialam jong ka sorkar ki kyrngah ban khot ia kren bad ki nongiakhih.
“Ka sorkar ka dei ban khot ban iakren halor ka ei ka nongrim ba kine ki nongiakhih ki ieng, namar ba ngi dei ki nongmih khmat jong u paidbah bad ngi hap ban sngap ia ka ud ka nam jong u paidbah bad ka dei ban don ka jingiakren” ka la ong.
Ka la ong ruh ba lada ka sorkar ka don ka jingsngewkhia ban pynhiar ia ka umphiang, ka dei ban khot ia ki paidbah ban wad ia ka lad ka lynti ban don ka jingiasngewthuh lang.
Ka la ong ruh ba ka sorkar kam dei ban phah da ki ki bor Districts, ban tuklar ia kane ka bynta hynrei ka dei ka kamram jong ki nongmihkhmat ban shim ia ka ne ka jingkitkhlieh ban weng ia kane ka jingeh.
Ka la kyntu ruh ia ki nongialam jong ki nongniah kali ba kim dei ban khang syndet sbak kumne namar ba kane ka jingiakhih jongki, ka la ktah jur eh ia u paidbah.
“Nga kyntu ia kine ki nongialam ki ba la khot ia ka jingiakhih ban ym dei ban wanrah ia ka jingiakulmar bad ban ym pynkhein ia ka jingshaniah jong u paidbah u ba ai ka kti ka diang kti kamon ha kane ka jingiakhih jong ki” ka la ong.
Kong Ampareen, phi dei shisha iba don ka jingstad bad jingshlur kum ka nongialam jong ki paidbah. Phim tieng ban kren beit ia kaba dei ban kren bad phi pyni da ki kam, da kaba iaid hi da ka kjat naduh iing haduh ka jaka trei kam.
Shano ki jah kiwei pat ki MLA ? Ki iaid ne ki par ne ki shong da ki rocket ne ki drone ?
Ngi donkam da kum kine ki MLA ym dei kum kito ki ba nang tang ban kren khlem pyni da ki kam jong ki. Im tieng ban kren ia ka badei khamtam ia ka load shedding bad kiwei kiwei ki kam ba iadei ia ki ba duk basuk.
Wat iehnoh, nang tur sha khmat Kong, baroh ngi don bad phi.