Byrthen ka KSU NKH, ba pynthut ka KPLT ban thep vote ha Block-2

Shillong, 10 Ïaïong:
Ka Khasi Students’ Union (KSU), North Khasi Hills district, mynta ka sngi ka la byrhen ur ia ka jingkhang lad ki lehnoh Karbi People’s Liberation Tiger (KPLT) ia ki nong thep vote hynnin ka Sngi Balang ha ki shnong kiba hap hapoh ka Block II, ha kaba kim shym la iohlad shuh ban leit jied ia u nongmihkhmat sha ka Ïingdorbar Thawaiñ ka Lok Sabha.
“Kane ka dei ka jingpynkheiñ ia ka hok long briew man briew ban thep vote, da ki lehnoh kiba la donkti ban pynwit bad pynthut ia ki nongthep vote ha kitei ki shnong,” la ong u Samla F Kharkam ni, president ka KSU NKHD na Ri-Bhoi

district.
U la ong kumba ka Election Commission ka la maham tyngeh ha u snem 2013 ban ym shah shuh ia kito kiba don kyrteng ha ki ar jaka ban thep vote ha ki jaka khappud kum ha Block II, kaba dei kawei na ki jaka ba iaknieh hapdeng ka Meghalaya bad ka Assam, hynrei ka KSU ka lyngngoh pat ba ka jingleh kitei ki kynhun kieng atiar ka KPLT ka long ban pynbor ia ki briew ha kitei ki shnong ka Block II ban thep ia ki vote ba kordor jong ki sha Assam, kaba long pyrshah ia ka hok ha ka saiñ hima sima ba ki briew ha kitei ki jaka kim treh shuh ban leit thep vote sha Assam.
U Samla Kharkamni u la ong ruh ba KSU ka pynrem jur halor kane ka jingleh ki dkhot ka KPLT ban pyntriem ia ki briew ha ka shnong Umlaper shi sngi shuwa ka sngi ban thep vote, ha kaba ki la siat pynma ruh ia kawei ka puh shilum (JCB) ha ka por 8 baje janmiet ban pynsheptieng ia ki briew kaba long kum ka jingpynbor ba kim dei ban leit thep vote sha Meghalaya na ka bynta ka elekshon sha ka Lok Sabha.
U la bynrap ruh ba ka KSU kam don jingtieng ban pynphai kylla ia ki kam be-aiñ jong ka KPLT lada ka dang bteng biang kumne pyrshah ia ki Khasi kiba shong ba sah ha Block II bad ka KSU kam banse ruh ban pynhiar kput kylla ia ki jaidbynriew Karbi kiba im bad shong sah ha ka jylla.
Ha kawei pat ka liang, u la pynrem jur ia ka sorkar jylla ba kam shym la lah satia ban pynbiang ia ki lad jingiada ne ki bor pahara ha shilynter katei ka thaiñ, khamtam ba ka Block II ka dei ka thaiñ ba don jingma kaba na katei ka jingkheiñ sting ka sorkar jylla ba ki lehnoh Karbi ruh ki nud ban pynibor pyrshah ia ki Khasi wat haba shit ba shai ka sngi ruh, u la ong.
U la ong bunsien ka KSU ka la dawa ia ka sorkar jylla ba ka dei ban buh noh da ka Police Outpost ha Ummat, khnang ban iada na ka jingshah wan thombor ha kitei ki riew pyntriem bad lada jia ba ki Khasi kiba shong ba sah ha kitei ki thaiñ ki shah hiar thma, mano ban bahkhlieh.