Byrthen ka JYO, ia ki trok kit palat

Shillong, 20 Naiwieng:
Ka Jaintia Youth Organisation (JYO) ka la ong ba kan leit ban kyndang naphang ia ki trok kiba kit palat pud ha ka thain Amlarem ka West Jaintia Hills hadien ba ka jingujor ka seng sha u SDO (civil) kam poi shaei shaei ruh.
Ha ka jingpynlait khubor, u Bah Banker Lymba u la ong ba katkum ka jingpynbna, ki trok ki dei ban kit hapoh 9 ton hynrei ki la kit palat haduh 20-22 ton u dewiong ban leit buh sha Bangladesh bad kane ka la wanrah ia ka jingma ia ka iaid ka ieng kaba ktah pat ia ki paidbah lada jia ei ei.
U Bah Lymba u la ong ba kane ka jingioh lad ki trok ban kit palat pud, dei ka jingbym leh ei ei u SDO (civil) ka Amlarem wat ha ka jingshisha ka seng ka la dep buh jingujor halor kane.
“Ngim banse ban leh hi da ka seng namar ba u SDO um sngap ia ka jingthoh ba la ai”, la ong u president ka seng JYO.