Byrthen ka AASU ban khang surok sha Nagaland

Guwahati:Ka All Assam Students Union (AASU) myn hynnin ka sngi, ka la byrthen ban khang surok, ban leit sha Nagaland bad katei ka dei, ban khang ia ka leit ka wan ki kali kit mar kiba pynbiang bam ia ka jylla Nagaland.

Ka daw, ka long namar ba katei ka seng, ka kynnoh ba ka Nagaland, ka la kurup ia bun bah ki jaka jong ka Assam.

Ka All Assam Students Union (AASU), ka kren shai ba kan nym ailad wat shi inshi ruh, ba ka jaka jong ka Assam, kan leit sha ka Nagaland.

Ki dkhot jong ka AASU na Jorhat, ki la leit jngoh ia ka Nagajanka, kaba dei ka jaka ba ki briew jong ka Nagaland, ki la thaw ktem ha ka khlaw jong ka Dissoi Valley Reserve Forest, ha ka 10tarik Naiwieng 2020, kaba hap ha ka Jorhat forest division bad katei ka la pynmih ia ka jing iakynad hapdeng kitei ki ar jylla khappud.