Byrthen ban ujor sha iing bishar, halor ka khaii dewiong beain

Shillong: Ka Garo Indigenous Development Federation (GIDF) myn hynnin ka sngi ka la byrngem, ba lada ka sorkar jylla kam shimkhia halor ka kam beain ha kaba iadei bad u dewiong, na ka liang kane ka seng kan leit ujor noh sha ka ingbishar.

Haba ia kren bad ki lad pathai khubor, na ka liang u George N Sangma, u la ong, ba wat la ha kine ki sngi na ka liang kane ka seng ka la dep ban ujor ia ka kam khaii beain ia u dewiong ha u Myntri rangbah ka jylla u Conrad K Sangma, hynrei haduh mynta ka sorkar jylla, kam shem la shimkhia eiei ban khang ia ka kam beain.

U la ong ruh ba ka jingiaid shait shait jong ka kam khaii beain ia u dewiong, ka dei ka jinglehrain ia ka sorkar jylla, namar ba kam lah ban tehlakam ia kane ka kam beain, ha kaba ki ia khaii beain bad ki kit ia u dewiong ha ka kyrteng u coke hynrei ka tnad ka ba dei peit ia kane ka kam ka iohthiah lyngngai.

“Ha ka 16 bad 17 tarik Kyllalyngkot palat 400 tylli ki trok ki la iaid khlem ka Challan na kine, 16 tylli ki dei ki trok kiba khaii dewiong da kaba shu kam ba ki kit Coke.”

U Sangma u la iathuh ba ka jing tih dewiong ka dei ha thain Shallang bad nangto ki shalan sha Assam lyngba ka Athiabari, Riangdo da kaba kam ba ki kit Coke napoh ki karkhana.

Na ka liang kane ka seng na Rilum Garo ka la dawa na ka sorkar ka dei ban leh ia kaba donkam pyrshah ia kine ki trok kiba iaid beain da kaba shu shim kyrteng ba ki shalan ia u Dewiong ba la thang namar ba kane ka wanrah ruh ka jingduhnong bakhraw ia ka jingioh lum pisa (Revenue) ka sorkar jylla.

U la iathuh ruh ba dang shen ka Goalpara District Coal Exporters and Truck Owners Association (GDCETOA) ka la ujor ba bun tylli ki trok kit dewiong kiba biang lut iaki kot ki sla lane ki Challan ki ju shah khrong pisa beain ha man la ki khyrdop kiba ieng hapoh ka surok bah NH 62.
U Sangma u la iathuh ruh ba kane ka jing khrong pisa ka dei kaba la donkti lut, da baroh kiba don ha ki khyrdop bad kine ki juh ki lum pisa beain na baroh ki trok kynthup ia kiba don ki kot ki sla.

U la ong ba la iohlum bun ki jingujor na ki trai bad ki nongniah trok ba ka jinglum pisa beain baroh ka la kot sha ka T.1,28,400 na bun tylli ki jaka kynthup ha Nanggal Police Station ka long T.2000, ha Nengkra Out Post ka long T.500, Dubu Police Outpost.500, Rongmil Police Station T.3100, MVI Rongmil Check point T. 1000 bad na kiwei kiwei de ki jaka.