Byrngem ujor mukotduma u Mukul ia ka UDP & NPP

Shillong, 22 K’Lyngkot:
U Myntri Rangbah ka jylla u Dr Mukul Sangma u la byrngem ban ujor mukotduma mynrain khmat pyrshah ia ki Liangpyrshah lada ki dang bteng ban kynnoh donkti ia u bad ki seng lehnoh.
“Nga shu sngap shwa mynta ship or. Ngan ujor beit sha ka Kashari pyrshah ia ka UDP bad ka NPP lada ki dang bteng ban pynjah burom ia ka nga na ka bynta ka kam myntoi sain pyrthei jong ki”, la ong u Dr Mukul haba kren mynta ka sngi Balang.
U la ong ba ki paid bah ka rilum Garo ki dei kiba stad bad ki tip kumno ki politishian ki long.
“Ha ka elekshon ha u 2003, u Purno A Sangma u la pyniakhun pyrshah ia nga da u kynum jongu ba dei u dkhot ka ANVC. Kane ka pyni mano ba don jingiadei bad ki kynhun lehnoh”, la kylli u Mukul ia u Purno.
U Dr Mukul u la ong ba u Purno haba kren ha jingialang paidbah ha Rongsak shwa ka elekshon ha u snem 2013, u la wohnia ia ka sorkar kaba thmu ban pynkut ia ki seng lehnoh.
“Ki dei ki juh ki briew kiba pyrshah ia ka sorkar ban pynkut ia ki seng lehnoh ki kynnoh ia nga”, la ong u Dr Mukul.
U la ong ba ka UDP ka shu pynlutkai ia ka por ban leit sha Delhi.
“Ka tnad Home Affair ka sorkar India ka don la kajong ka jingtip shaphang ki politishian kiba iadon bynta bad ki seng lehnoh. Ki don ki jingtip ba bniah ia baroh ki politishian”, la ong u Dr Mukul.
U la ong kum u Myntri Rangbah, u tip kaei kaba don hapoh, mano ba leh ia kawei ki leh.