Shillong:Ki nongshong shnong ka West Jaintia Hills District ha khappud Bangladesh, ki don ha ka jingsyier mynsiem, kaba jur, ha kine ki khyndiat sngi ba ladep, na ka daw, ba ki Border Security Force (BSF) kiba dei ki nong iada ia ka jing wan kyrthep, ki khar Bangla sha India, pynban ki dei kita ki nong pynklumar pynsmiej ia ki paitbah ia u nong India.
Kane ka la jia ha shong Muktapur War Jaintia bad ki paitbah ryngkat ka seng Hynniewtrep Achick National Movment (HANM) War Jaintia Circle myn ha ka sngi Palei ka 29 tarik u Nailur 2022, ki la wan ia kynduh ban aiti ia ka dorkhas ha u Myntri ka tnad kam poh iing ka sorkar jylla, u Bah Lakmen Rymbui, halor ka jing pynthut bad pyndik ki Border Security Force (BSF) ha West Jaintia Hills District ha khappud Bangladesh.
Hadien ba mih na ka kamra jong u Ma Rymbui, u President ka HANM War Jaintia, u Bah Shaniahlang Suchen ula kren sha ki lad pathai khubor, ki la ai por 7 sngi ba ki BSF, kin sangeh na kitei ki kam thombor jongki, hynrei, lada kim leh eiei, kumta na ka liang ka shnong, kan sa mih lang khrui ban thom da ka bor ia ki shipai BSF.
Shuh shuh u Bah Suchen, ula iathuh ba ka jing pyndik ki BSF kam dei tang shisien lano, hynrei bun bun sngi ki ju pyntieng pynsmiej ia ki nongshong shong bad kaba ma ka long ba ki BSF ki ju leh shutia ia ki kynthei khyllung khynnah haba ki leit sum sha ki wah bad kane ka long kaba ma, ba shisien ioh kin thombor ne bat bor ia ki kynthei. Shuh shuh ula iathuh shwa ba kin mih na iing ban leit ha ki lum ki wah ban rep ban riang, ki pynkulmar shwa da kaba kylli bniah bad pynlong ka jing toh kit wat hapoh shnong, shwa ban wan na la ki jong ki jing trei ki leh kum juh man ka sngi bad haba ki wan na iew Jowai ban thied ki marbam mar dih bad ha shiteng lynti, ki shah bat ban tohkit ban pan ki kot ki sla kaba buh jingeh ia ki nongshong shnong.
Na kaliang u president ba rangbah ka seng HANM, seng kmie ula byrngem ba katkum ka jingwan ia kynduh kaba ki la buh por 7 sngi, ba lada khlem pynsahngeh ia kane ka jing thombor ki BSF, ka seng ka la kop ba 60 tylli ki kali kin hiar ha kitei ki jingjia ba shah pyndik bad ba kan lah ban sa mih kaei kaei ka jingjia, lada ym lah ban teh lakam.
Ka biang