Byrngem shah thngan ha phyllaw ka KHADC, na ka surok Wahkaji

Shillong, 26 Jylliew:
Ki Trai khyndew na ka thaiñ War San Lyngdoh, ki la byrngem ban shong shah thngan ba khlem pud ha phyllaw ka Khasi Hills Autonomous District Council (KHADC), namar ba ka district Council ka pyn slem ban ai jingmynjur lane ka No-Objection Certificates (NOC) na ka bynta ban shna ia ka surok 2 lane na Nongstoiñ-Wahkaji-Mawthabah. U Chairman jong ki Trai Khyndew ka thaiñ War San Lyngdoh u bah O S Myrthong u la ong ba ka daw ba ki trai khyndew ki la jied da katei ka lynti ka dei namar ka jingsohsat bad ka jingjynjar ki paidbah jong katei ka thaiñ namar ka jingbym don ia ka surok kaba biang. “Ki kynthei ba pun khun ki iap ha shiteng lynti namar ka jingsniew palat ka surok, ki nongrep ki shem jynjar ban pyniaid iew ia ki mar-rep jong ki” u la ong. Utei u rangbah u la kyntu ia ka KHADC ba ka dei ban ai noh kloi ia ka NOC khnang ban lah ban weng noh ia katei ka jingeh ki paidbah.