Byrngem sa ki dorbar shnong, ban iasnoh kti bad u Bah Adelbert

Shillong, 21 Jymmang:
Hadien hynriew sngi ba u CEM barim ka KHADC u Bah Adelbert Nongrum bad u samla Goldy Warjri ki la pyn long ia ka jingshah thngan ban dawa ia ka sorkar ban pdiang noh ia ka Village Administration Bill, 2014, ki dkhot jong ka dorbar shnong na Thyn roid ki la byrngem ban iasnoh kti lang ha ka jingshah thngan ba khlem buh por ban pynjur ia ka jingdawa ia ka sorkar.
U secretary ka Dorbar shnong Thynroid u Bah Harkin Warjri haba iakren bad ki nongthoh khubor hynne ka sngi Palei, u la ong, “Ngi ai ka jingkyrshan ba pura ia u Bah Nongrum bad lada donkam ngin wan ban iasnohkti lang ban shah thngan khlem buh  por”, la ong u Bah Warjri.
Haba pynpaw ia ka jingsngew khia jur ia ka rai jong ka Meghalaya High Court kaba sloit ia ka iktiar jong ki bor shnong, u Bah Warjri u la ong ba ka jingdonkam mynta ka long baroh ban iawan ban iasnoh kti lang ban iakhih da ka lynti ka synshar paidbah khnang ban pynsah ban iada ia ka jaitbynriew.
U la ong ba ki rangbah shnong ki dei ki budlum jong ka imlang sahlang ka jaitbynriew. “Lada ia ka bor jong ki la shim por, ka district council, ka hima bad ka bor shnong kin jah noh”, u la ong.
Ka dorbar shnong ka kyntu ia baroh ki paidbah ba sngew khia kynthup ia ki seng sain pyrthei ban wan shakhmat ban iasnohkti lang bad ka jingshah thngan u Bah Nongrum na ka bynta ka jingbit jingbiang jong ka jaitbynriew.
U Bah Nongrum bad u samla Warjri ki la pynlong ia ka jingshah thngan ha ka sngi ba hynriew hynrei haduh mynta ka sorkar kam ai jubab eiei.
“Ngi kyntu ia ka kur Nongrum bad ka kur Warjri ba kin iawan paidbah ban ai ia ka jingkyrshan ia u Bah Nongrum bad u samla Goldy  halor kane ka mat, kaba donkam palat”, la ong u secretary ka Thynroid.
U la ong watla um pyrshah ia ka ordinance ka sorkar kaban treikam hynriew bnai,  ”Hynrei nga sngew lyngngoh kaei ka ordinance kaban weng ia ki jingeh haba tang hynriew bnai kan treikam bad haba ka don ka jingpyrshang ban pynduh ban pyndam ia ka riti dustur”, u la ong.
U Bah Warjri u la pynrem jur ia ka jingbym ler jong ki 60 ngut ki MLA bad ki 30 ngut ki MDC ka Autonomous District Council ban pynbor ia ka sorkar ban pdiang ia kane ka Bill.