Byrngem pyniap lut ia ki khlieh shynrang ha Mawbuit

Nongstoin, 14 Iaiong:
Hadien ba ki seng bhalang, ki seng longkmie bad ki katto katne ki nongialam shnong jong ka shnong Mawbuit, ki la leit ban khang noh ia ka Dukan Kyiad jong u bah Krispin Sangriang kaba don ha ka shnong Mawbuit; na ka liang jong u bah Krispin u la byrngem byrsit ia kitei ki nongialam shnong kynthup ruh ia ki seng longkmie bad sengbhalang ba lada kin dang nud ban wan khang biang ia katei ka dukan kyiad ha ka sngi kaba bud un siat pyniap, ia kiba thmu ban wan khang biang ia ka dukan ka jong u bad u bah Krispin u la byrngem ruh ba lada um ioh ban leh da lade ia katei ka kam un phah ban kput da ki kynhun lehnoh.
Ia katei la pynshi sha katkum ka jing ujor, ba la wan ban ujor da ki sengbhalang, seng long kmie bad ki nongialam shnong jong ka shnong Mawbuit ha ki Pulit ka Nongstoin, pyrshah ia u tei u trai dukan u bah Krispin Sangriang halor kitei ki jingbyrngem byrsit ka jong u. Ym tang katta, ka la don ruh ka jingujor kaba long pyrshah ia ka kong Irismary Sangriang kaba dei ka khun pyrsa jong u tei u trai dukan kyiad halor ka jingbyrngem ka jong ka, ba kan phah da ki kynhun lehnoh ban pyniap ia baroh ki khlieh shynrang bad ia ki kynthei pat yn phah leh don bor bad phah leh beijot.
Shuh shuh ka jingujor ka long ruh pyrshah ia u bah Charles Langrin halor ka jingshon dur ka jong u ia U Sordar bad Asst Secretary Shnong Mawbuit bad kumjuh ia ki seng bhalang bad seng longkmie bad u la byrngem ruh ba ia kitei ki dur ia kaba u la dep ban shon ha ka 9 tarik mynta u bnai ha kapor 2PM, un sa leit ban ai sha ki kynhun lehnoh ban phah kput ia kitei kiba la shah shon dur bad na ka liang jong kitei kiba la shah shon dur ki la dawa ruh ia u bah Langrin ba u dei ban pyndam noh ia kitei ki dur kiba u la shon.