Byrngem pyni bor ka KSU, lada iuh kjat ka UCIL ha SWKH

Shillong, 21 Nailur:
Ka KSU South West Khasi Hills District ka la byrngem ba ka long kaba la khreh ban ia khun pyrshah ia ka UCIL lada kan dang wan pyrshang ban iuh kjat hapoh ka tei ka thain. Katei ka jingbyrngem ka KSU ka dei hadien ba ka la ioh jingtip ba katei ka kompeni ka don jingthmu ban hiar biang sha Umdohlun ha ka 24 tarik mynta u bnai.
Katkum ka kyrwoh khubor na u General Secretary ka KSU SWKH u samla Forwardman Nongrem u la ong ba ka UCIL ka la sdang ban wan pynbiej ia ki paidbah ka thain Umdohlun ha ka kyrteng ka roi ka par bad ha ka 18 tarik u la ong ba ka la lum jingialang paidbah hynrei marsien ioh jingtip ba ki dkhot ka KSU ki hiar sha katei ka jaka katei ka kompeni ka la pynsangeh noh. “Ngi pynrem jur ia kane ka company ba ka la thmu ban wan kum u Suri kup snieh langbrot da kaba pyrshang ber mluh da ki kular ban wanrah iaka roi ka par” ong ka kyrwoh na u GS ka KSU SWKH.
Katkum ka jingong utei u nongialam ka KSU u la ong ba ka KSU ka la ioh jingtip ruh ba katei ka kompeni ka la pyrshang ban phah lum ia ki thup kyrteng jong ki khynnah kiba don ha ki skul bapher bapher ha ki ejen jong ka ryngkat ki kular ban iarap pisa. “Ngi kyntu ia ki paitbah katei ka thain ban long kiba iohi jngai namar ha lyndet ia kane kynmaw ka pateng ban wan kan sa mad iaka lanot khop lada ngi bakla ban shim rai. Ngim sngewphylla eiei ruh em ba kane ka Company Uranium ka rieh tngen ruh ialade hapoh ka Company BSC CC&JV kaba dei ka company ba mut shna ia ka Surok Uranium Na Nongstoin shaduh Mawthabah haka jing jngai ba 68 kms” ong biang ka kyrwoh.
“Ngi kren ruh da kaba shai ba ym don jaka ia ka Company UCIL hapoh u pud u Sam jong ka South West Khasi Hills District bad lada kam kohnguh ia kane ka jingmaham jong ngi ka KSU SWKH ka la long kaba la pynkhreh ban shim da kano kano ka lynti ban iakhun pyrshah ia ka. Ngi la ioh jingtip ba kan wan hiar biang 24 tarik hynrei ngi dawa ba ka dei ban kiar Na kaba wan bsuh khlieh hapoh kine ki thain lem kumta ka Seng ka la long bala pynkhreh ban iatyngkhuh” pynkut ka kyrwoh na u samla Forwadman Nongrem GS KSU SWKH.