Byrngem pynhiar kput ka KSU, ba shah lehbeiñ ki Khasi ha Block II

Nongpoh, 22 Jymmang:
Ka jingiai shah dawa pisa ki Khasi kiba shong ba sah ha ki shnong kiba don ha Block II ha ki lehnoh ba la kam ba ki dei na ka seng Karbi Peoples Liberation Tiger (KPLT), ka la pynsat sia ia ka Khasi Students’ Union (KSU), kaba dei ka seng ki samla pule ha ka jylla.
Ka KSU, North Kha si Hills District Unit, hapoh ka jingialam jong u Samla Ferdynald Kharkamni, president ryngkat bad u Samla Vincent Makri, general secretary bad kiwei kiwei ki nongialam, mynta ka Sngi Palei kim banse ban leit kynduh noh markhat ia ki bor ka district ha Ri-Bhoi, namar katei ka jingshah lehbeiñ ki khasi ha katei ka thaiñ.
Ha ka jingiakynduh hynne ka sngi bad ki bor district, namar ka jingbym don ka DC jong ka Ri-Bhoi, kumta na ka liang ka KSU ka la leit kynduh noh ia u Additional DC (ADC) jong ka district, u Bah P.S Kharkongor, ban pynpaw hakhmat jong u ia kane ka jingshah lehbeiñ ki paidbah Khasi bad ha katei ka jingiakynduh, la don lang ki Rangbah Shnong na ki shnong ka Block II bad ki dkhot ka KSU na ka district.
Ha ka jingiakren, u president ka KSU NKHD unit, u la ong ba na ka liang u ADC u la mynjur ban bthah ia ki bor pulit ban buh shipor ia ki pulit ha Umtlieh bad Madan Umwang, khnang ban iada ia ki paidbah Khasi kiba don ha kitei ki jaka na ka jingma kaba ap ia ki, kaba ki shah pynthut na ka por sha ka por.
U la ong ruh ba ka KSU ka byrthen kylla ba lada ki lehnoh Karbi ki dang iai bteng ia ka jingdawa pisa, kim banse ban pynhiar kput kylla ia ki Karbi kiba shong ha ki shnong bapher bapher jong ka jylla khamtam ha ki bynta jong ka Ri-Bhoi district.
Ka KSU ka la ong ruh ba ka kyntu syndon ia ka sorkar jylla ba ka dei ban pynbeit noh mardor ruh ia ki pud ki sam hapdeng ki ar jylla, kata ha ka jylla Meghalaya bad Assam, namar dei na katei ka daw ba sa mih ki jingiakynad hapdeng ki Karbi kiba dei na Assam bad ki Khasi kiba don ha Block II bad ba sa mih ruh ki lehnoh Karbi kiba shim kabu ban dawa pisa haduh da ki hajar tyngka kawei ka ïing Khasi ha katei ka thaiñ.
Haba la ioh iakren bad u ADC ka district, u Bah Kharkongor u la ong ba na ka liang ki ar tylli ki bor district kin pyrshang ban wanrah ia ka jingshong suk shongsaiñ ia ki paidbah katei ka thaiñ, kata hapdeng ka Ri-Bhoi district bad ka Amrhen district jong ka Karbi Anglong, Assam.
U la bynrap ruh ba hadien ba u la iohsngew ia kat kane ka jingjia, u la dap da ka jingsngewsih bad un sa ai ktien sha ki bor bahalor ba kin pynjur ia ki pulit pahara ha Mawlasnai, khnang ba kin lah ban tehlakam ia ka shongsuk shongsaiñ sha kitei ki shnong kiba mad ia katei ka jingshah dawa pisa na kitei ki lehnoh KPLT.
Haba la ioh iakren bad u Rangbah Shnong ka Umtlieh, u Bah Precious Masharing, u la iathuh ba ki lehnoh ba la kam ba ki dei na ka kynhun KPLT lyngba u Area Commander, uba la kren da ka ktien Karbi, u la byrngem ia u naduh ka 14 tarik Jymmang hadien ba u la ioh ia ka kam kum u Rangbah Shnong, ba kawei pa kawei ka longïing ha katei ka shnong ka dei ban siew sha ki ha ka dor T.2 hajar shi ïing bad lada kim lah ban siew, ma u kum u Rangbah Shnong

un mad ia u kuli, hynrei hadien ki la hiar noh na katei ka dor ba ki la buh haba la iai kyrpad bad ka dor ba ki la buh ka long T.1 hajar kawei ka ïing.
Ha kaba iadei bad kane, na ka liang ka KSU Raid Nongtung Circle, lyngba u punlicity secretary jong ka, u Bah Johny Nongrum, u la pynrem jur ia kitei ki lehnoh kiba mih ha ka kyrteng jong ka seng thymmai. U la ong ruh ba ka seng da lei lei ruh kan ym kynran dien halor kane ka jingshah lehbeiñ ki Khasi kiba shong ba sah ha kitei ki shnong ka Block II bad ka seng kan mih shakhmat ban iarap ia ki ha kano kano ka por.
Hadien ka jingiakynduh bad ki bor district, na ka liang ka seng ka la leit kynduh ruh ia ki bor pulit ka district, hynrei namar ka jingbymdon u SP, kumta ki nongialam katei ka seng ki samla pule lem bad ki Rangbah Shnong ki la leit kynduh noh ia u DSP Headquarter ka district, u Bah B.J Laloo, ha kamra treikam jong u.