Byrngem mih paidbah ka NTC ban pyrshah Weighbridge ha Nongpoh

Nongpoh, 7 Naitung:
Kum ka jingpyr shah halor ka jingthmu ka sorkar ban buh Weighbridge ha phyllaw ka ophis u DTO, Nongpoh, ka Nongpoh Town Committee (NTC) ka la pynher ruh da ka dorkhas sha u Bah HDR Lyngdoh, uba dei u Myntri ka tnad Transport jong ka sorkar jylla ban pynpaw ia ka jingpyrshah kaba jur lada ka sorkar kan buh Weighbridge ha katei ka jaka.
Nalor ka dorkhas kaba la phah sha u Myntri ka tnat Transport, ka NTC ka la phah kopi ruh sha u Commissioner Secretary ka tnad Trasport jong ka jylla, nangta sha u Dr. D.D Lapang, Local MLA ka Nongpoh Constituency, Deputy Commissioner ka Ri-Bhoi District bad sha u Project Director ka National Highway Authority of India (NHAI).
U Bah Rayonald Kharkamni, Programme & Development Secretary ka NTC haba iakren bad ki nongthoh khubor, u la ong ba ka daw kaba pynlong ia ka NTC ba kan shimkhia halor jong kane ka kam, ka dei namar ba ki la iohi lypa ia ka jingeh kaba ki paidbah kin sa iakynduh lada ka sorkar kan buh Weighbridge ha katei ka jaka, u la bynrap ruh da kaba ong “ lada ka sorkar kan buh Weighbridge ha katei ka jaka, yn ym artatien ba kan sa wanrah beit ia ka jingdheng ki kali kaba jur bad ka ban wanrah jingeh ia ki paidbah bad khamtam ia ki nongleit nongwan” ong u Bah Kharkamni.
Shuh shuh, u la ong ruh ba ka NTC ka sngewlyngngoh halor kaneka jingmut jong ka sorkar ban buh Weighbridge ha katei ka jaka, namar kane ka jaka ka don hapdeng ka Sor Nongpoh bad ym ju khambna ha kiwei kiwei ki jylla ka ri India, ba ka sorkar kan buh Weighbridge hapdeng Sor jong ka District, u la bynrap.
Kumta, hadien ba ka NTC ka la dep ban pynher dorkhas sha u Myntri ka tnad Transport bad sha kiwei kiwei ki heh jong ka sorkar, na ka liang ka NTC kan ia wer ia ki paidbah, ki dorbar shnong bad ki sengbhalang ban mih na ka bynta ban pynpaw ia ka jingpyrshah bad ban iamih paidbah halor jong kane ka jingwan buh Weighbridge da ka sorkar ha pdeng Sor, u la bynrap.
Ha kajuh ka por, na ka liang ka Ri Bhoi Tourism & Environmental Development Forum (RBT&EDF) lyngba ka kyrwoh na u Bah Wanphrang Sumer, Publicity Secretary, u la ong ba ka seng ka ai ka jingkyrshan kaba pura ia ka NTC, halor ka jingpyrshah ia ka sorkar ban buh Weighbridge ha katei ka jaka, namar katei ka jaka ka don markhap ruh bad ka ophis treikam ka RBT&EDF bad lada ka Weighbridge kan don ha katei ka jaka kan ktah ruh wat ia kam ban kyntiew ia ka kam jngohkai pyrthei.