Nongpoh: Haba pynpaw ia ka jingbitar halor ka jingthut ba khah khah ka bording ha Ri Bhoi bad khamtam eh ha kito ki jaka kiba hap hapoh ka jingpeit jingkhmih ka MeECL Nongpoh Division, ka Federation of Khasi Jaintia & Garo People (FKJGP) North Khasi Hills District, ka la byrthen ban leh da kaba tyngeh ia ka tnat kaba peit ia ki kam bording.
U bah Luistar Lyngdoh, President ka FKJGP, NKHD, u la ong ba ka seng kam banse ban shim da kiwei pat ki lynti kiba kham tyngeh, namar ba ka seng kam lah shuh ban kun ia ki jingujor kaba ki la ioh na ki riew paidbah, kiba la pynpaw ia ka jingbitar ia ka tnat MeECL, namar ka jingthut kaba khah khah eh ka bording bad kaba la wanrah jingeh shikatdei eh ia ki paidbah ha kiba bun ki thain ha Ri Bhoi.
Haba iadei bad kane ka jingthut kaba khah khah ka bording, ka seng ka buh jingkylli na ki na ki bor kiba dei peit ia ki kam bording, ba balei ka bording ka thut eh ha Ri Bhoi bad kaba la pynjynjar eh ia ki paidbah, namar haba wan u slap bad ka lyer kaba khyndiat tang khyndiat, kaba mut tang katta hi ka bording ka la lip bad ba ki paidbah ki hap ban ap da kiba bun bun kynta, la pynpaw utei u nongialam ka FKJGP ha Ri Bhoi.
Kumta na ka liang ka seng, ka dawa na ka tnat MeECL ba ka dei ban pynbiang mardor ia ka bording bad lada nangne shakhmat kim lah ban pynbiang, kaba mut ba ka seng kan sa shim da kiwei ki sienjam kiba kham tyngeh, kren kut utei u nongialam ka FKJGP.
Phi don ban ong eiei?