Byrngem ki Rangbah Shnong, ban dawa weng shuki ia U Lat

Shillong, 21 Nailur:
Palat 500 ngut ki Rangbah shnong kynthup naduh ki dkhot jong ki Dorbar Shnong lem bad ki longkmie ruh ki la wan ban ia shong kyraiñ mynta ka sngi hajan ka Addl Secretariat.
Katei ka jingshong kyraiñ ka la sdang naduh ka por 11 baje eiei haduh ka por 3 baje janmiet.
Lah ban kdew ba katei ka sienjam kaba –ar jong ka jingiakhih ki Rangbah, namar ka jingpynslem u Lat ban mynjur noh ia ki bill ba la pass da ka KHADC bad JHADC, hynrei mynta ka kynti, ki la shim ia ka rai ban ai por ia u Lat katto katne sngi khlem da buh por ba un mynjur noh syndon ia ka VAB kaba la pass da ka KHADC.
Ki la byrngem ba lada u Lat um shym la mynjur noh ha kine ki khyndiat sngi, kin thoh sha u President ka Ri u Pranab Mukherjee ban pyntip ia katei ka mat bad ki la byrngem ruh ba lada jia ba u Lat un ym mynjur katkum ka sngi ba khmih lynti, la ong ba kin thoh sha u President ba un khot noh sha Delhi ia une u Lat ba mynta bad ban bujli noh da uwei pat u Lat ha ka jaka jong u, hynrei ka sngi pat ban thoh sha u President kim pat shym la shim rai “Hynrei lada jia ba un dang pynslem ngin thoh beit sha u President” ki la ong. Ha kaba ia dei pat bad ka jingkyntur pud ka MUDA ki Rangbah Shnong ki la ong ba ki ieh ha ka jingstad ka District council kaba ia kren bad ka sorkar jylla.
Lah ruh ban kdew ba ka jingiakhih ki Rangbah Shnong naduh ba sdang ka long ban pyrshah ia ka jingpynslem u Lat ban mynjur noh ia ki Bill ba la pass da ka KHADC bad JHADC, ban pyrshah ia ka jingkyntur pud ka MUDA , ban pyrshah ia ka jingthmu ka sorkar ban wanrah ia kawei pat ka ainl bad ban pyrshah ruh ia kino kino ki bill ba ka sorkar ka thmu ban wanrah kiba ia dei bad ka synshar khadar kiba dang hap hapoh ka jingpeit ka District Council.