Byrngem ki nonghikai sia lieh ban mih madan, lada pynduh kam ka sorkar

Shillong, 03 Rymphang:
Ki nonghikai kiba shah byrngem ha ka sor kar ban pynduh kam halor ka jingkynnoh ba la thung beain, ki la byrngem kylla ia ka sorkar ba kin mih madan lada ka sorkar ka iaid shakhmat ban pynduh kam ia ki.
“Lada ka sorkar ka iaid shakhmat ban pynduh kam ia ngi, ngim banse ban mih madan”, la ong uwei na ki nonghikai uba don ha ka thup ban shah weng kam u Bah S Siang shai haba kren hynne ka Lah sngi u Blei ha Shillong Press club.
Ka sorkar ka la thmu ban weng kam ia ki 253 ngut ki nonghikai LP halor ka jingkynnoh ba shah thung kam beain 2010 ba la lap da ka High Level Committee ba la thung da ka sorkar ban tohkit hadien ba la sei madan da ka CBI.
“Ngim shaniah ba kane ka jingtohkit kan long kaba khuid”, la bynrap u Bah Siangshai, namar la thung kam iangi da ka hok.
U la ong, ” Lada ka sorkar ka beh kam jubor ia ngi khlem ka sakhi kaba biang, ka sorkar ka la thombor ia ka hok jong ngi”.
U la ther ia sorkar ba ka jingthmu ban beh kam ia ki nonghikai bala pynskhem ka la pynlong ia ki nonghikai kum ki Langknia katba ka jingthung kam beain ha kiwei pat ki tnad sorkat ym don ba pushe eiei.
“Kane ka jingthmu ban pynduh kam ia ki nonghikai kadei tang kik kam politik”, u la kynnoh u Bah Siangshai.
Lah ban kdew ba ka sorkar ka la pan jubab na kitei ki nonghikai hapoh ka 10 tarik u Kyllalyngkot.
Katkum ka jingiakren bad u Director ka School Education and Literacy u Ambrose CH Marak u la iathuh ba u la dep phah ia ka jubab sha ka sorkar bad ka shong sa ha ka sorkar ba kan leh ia kaba donkam.
U Director u la iathuh ba baroh khoit ki nonghikai ba la shah thung kam beain ki la kyntait ia kane ka jingkynnoh jong ka sorkar.
“Nga la aiti ia ki jubab jong ki nonghikai baroh sha ka sorkar bad nga dang ap ia ka rai na ka sorkar halor kane”, la ong u Director.
U la iathuh ba ki nonghikai baroh kiba don ha ka thup shah pynduh kam ki long 92 ngut na Jowai, 21 ngut na Tura, 37 ngut na Amlarem, 43 ngut na Dadenggiri bad 60 ngut na Shillong. Napdeng kine ki nonghikai ym don iwei ruh na Ri Bhoi bad na West Khasi Hiills ki bym don ha ka thup ban pynduh kam, katkum ka jingong u Director.
Kine ki nonghikai ki la shah kynnoh thung kam beain ha ka por ba dang long Myntri Pule puthi ka Kong Ampareen Lyngdoh hadien ba la sei madan da ka CBI.