Byrngem ki 6ngut, ba shah kynnoh nongmane ksuid

Shillong,16 Jylliew: 6 ngut ki nongshong shnong ka Shangpung –Mission Compound ki la byrngem ban leit rah sha ka ain ia ki briew kiba la pynsaphriang ia ka hamsa ia ba ki dei ki nongmane ksuid, bad ia mynta ki la ong ba kim pat lap ia ka tynrai naei katei ka jingkynnoh ka mih hynrei kin wad haduh ban da lap bad kin leit ban ujor sha ki bor ka ain pyrshah ia kita ki briew. U samla Eikihun Chullet, uwei na ki nong shah kynnoh haba ia kren sha ki nongthohkhubor mynta ka sngi, u la ong ba u la kyndit ban tip ba bun na ki briew ha katei ka shnong ki la ong ia u ba u dei u nongmane ksuid, bad haba la kylli kim shym la iathuh ia ka tynrai ba la mih katei ka jingkynnoh hynrei ki shu ong beit ba ki shu ioh sngew na ki briew.

U la ong ba katei ka jingshah kynnoh nong mane ksuid jong u – ka la saphriang mynta la saw-san sngi bad ka par lut sha manla ki kyndong kynshrot jong ka shnong mynta la ar sngi, u la ong ba ka jingkynnoh nongmane ki kynnoh tang ia u shimet ym ia ka ing jong u, ki la don ruh 5 ngut kiwei pat ki paralok kiba ia rung ia mih bad ki ia dei kam bad u kiba la shah kynnoh nongmane ksuid, ki paralok jong u kiba la shah kynnoh nongmane ksuid ki dei kiba la tip kyrteng kum ka kong Julida Lytep, Yurika Ymbon,Lim Phadong, Ribul Sungoh, Tei Law. Halor katei ka jingshah kynnoh, na ka liang u bah Chullet u la kynnoh ba ki briew kiba la pynsaphriang ia katei ka khubor lamler ki dei ki briew kiba bishni bad kiba kwah ban pynjah burom ia u, u la ong ba ha k ajingshisha u la thmu ban leit ia kynduh ia ki bor shnong, hynrei u la iathuh ba ka khubor ka la saphriang shaba palat kumta ban tem shuwa ia katei ka ding u la wan ban ia kynduh shuwa ia ki nongthohkhubor bad hadien un sa leit ban ia kynduh ia ki bor shnong ban ia kren halor katei ka ka kam. U bah Chullet u la iathuh ba kiba leh ia katei ka kam ki dei tang ki nongbishni bad kiba kwah pynjah burom ia u bad u la kynnoh ba ki dei ruh ki briew kiba napoh ka shnong jong u hi, ha kaba u la ong ba un wad haduh ban da lap na iwei pa iwei na ei ka mih ka tynrai jingkynnoh bad hangta un sa leit ban pyntip sha ki bor ka ain.