Byrngem khangtala ka HYC ia ka ophis ka directorate of school education lada ym pyllait ia ka baibam ki khynnah

Shillong 14 Naiwieng: Ka Hynniewtrep Youth Council (HYC) Education cell hapoh ka jingialam u samla Hunki Shylla ha ka 14 tarik Naiwieng 2024 ka la leit ban iakynduh ia u bah Rakkam Sangma u myntri ka tnad pule puthi bad buh ruh da ka jingthoh ha ka ba iadei bad ka jingpynslem ka sorkar ia ka baibam ki khynnah skul lane ka scholarship.
      Ka jingwan iakynduh ka seng kadei hadien ka jingud jingnam jong ki ba bun ki samla pule ba haduh mynta kim shem la pat ioh ia ka scholarship.

Ha ka jingiakren bad ki lad pathai khubor u samla Hunki Shylla uba dei ruh u Join secretary ka CEC ula ong, ba ka sorkar pdeng ka la dep ban pyllait lut ka pisa ha u bnai nailur hynreibka sorkar jylla kam pat pyllait lut sha ki khynnah pule.

Ula ong ruh, ba ka sorkar ka pyllait ia ka baibam jong ki khynnah pule kadei beit hadien ba ka seng ka la wan byrngem bad Ka seng ka la phah ruh ka jingthoh ban phah dawa ia ka sorkar lyngba u bah Rakkam ban pyllait noh ia ka scholarship.

Katkum ka jingtip jong ka seng, ba ka baibam (scholarship) ki khynnah pule ba kim pat ioh kadei jong u snem 2023-24 bad ka seng ka sngewkhia ha kaba iadei bad ka jingbymshimkhia ka sorkar ka ba ju leh mutlop beit man kapor, ha kaba ka sorkar i kumba ka ap lano kin wan kita ki riewpaidbah ban dawa, ong u samla Hunki.

Ula ong ruh, ba ka sorkar kam dei ban shu setsah ia ka baibam ki khynnah, hynrei kidei ban pyllait beit man u snem, da kaba ula ong, ba haduh mynta bun ki khynnah kim pat ioh ia ka baibam. Lyngba kane ka baibam ka iarap shibun ia ki khynnah ban siew ia ka bai Ka jingpynslem ka sorkar ia ka baibam ki khynnah ka la ktah bha khamtam ki ba wan na ki longiing ki ba duk

Kumta ka seng ka la phah da ka jingthoh sha u bah Rakkam uba dei peit ha ka tnad pule puthi ban iakren ba dei ban pyllait noh ia ka bainong ki khynnah skul ne ka scholarship bad ka seng ka la kren da kaba shai ba kan aipor 10 sngi, ba lada ka sorkar kam pat pyllait, kan sa pynlong ia ki jingialang, da kaba byrngem ruh ba kan leit khangtala syndon ia ka ophis ka directorate of school education.