Byrngem khang tala ia ka ophis Vodafone, ba thung kam bar Jylla

Shillong: Ka KSU Nongthymmai Circle, hapoh ka jingialam u Genl secy samla Richard Mawkhiew, General Secretary, ka la leit mardor sha ophis jong ka Vodafone, ban pynsangeh ia ka jingthung kam da u bar Jylla.

Katei ka seng, ka la ioh jingtip ba ka company Vodafone, ka mut ban thung da u bar jylla ia ka kam Administrator, ban peit ia ka nongbah Shillong bad ki jaka marjan bad kumta ki dkhot jongka ki  la leit mardor sha ka jaka treikam katei ka company ha Laitumkhrah, Shillong ban pynsangeh mardor ia katei ka jingthmu thung kam.

Ha ka jingiakynduh bad u ASM kane ka company, ki nongialam ka seng ki la pynpaw ia ka jingpyrshah ban wanrah da u bar jylla bad kane ka long ka jingiuhroit iaka jinglong trai ri trai muluk,  nalor ka jingkyrduh kam kaba jur hapdeng ki samla khasi ba la pass ha ki kyrdan pule ba kham shajrong. “Lada phim thep da ki trai ri ban trei ngim banse ban wan khang tala noh ia kane ka kompani”  la byrthen u samla Richard Mawkhiew ia ki heh ka kompani Vodaphone.