Shillong,11 Nohprah:
Ka Public Accounts Committee (PAC) jong ka Meghalaya Legislative Assembly mynta ka sngi ka la ong ba ka tnad Aiñ ka sorkar jylla kam shym la shim ia ka jingai jingmut jong ka ha kaba ia dei bad ka rukom treikam jong katei ka tnad, “Ngin thoh Affidavit sha High Court ban pyni ba ka PAC ruh ka don la ka jong ka bor ban treikam” ong u bah Paul Lyngdoh Chairman ka PAC uba dei ruh u MLA ka UDP na Shillong West.
Lah ban kdew ba ha ka 26 tarik u naiwieng, ka tnad Aiñ ka sorkar jylla lyngba u Special Secretary jogn ka u L.M Sangma ka la thoh Affidavit ha kaba ia dei bad ka rukom treikam jong ka PAC bad ka la ong ba ka PAC ka don la u jong u pud ban treikam ha kaba ia dei bad ka jingsiew bai lut ksan sha ki trai jaka. Katei ka la mih hadien ba ka PAC ka la tohkit bniah ia ka jingkynnoh ba ladon ka jingbym biang ka rukom siew ia ka bai lutksan sha ki trai jaka ha ka jingpynheh ia ka kad liengsuin ha Umroi, Ri-Bhoi District.
U bah Paul u la ong ba ka kamram jong ka tnad Aiñ ka dei ban peit ban khot bad pan ia ka jingiohi ne ki jingkdew ka PAC bad ka Assembly Secretariat, u la ong ruh ba ka Executive kam lah ban kren ha ka kyrteng jong ka iing dorbar. Katba u bah Ronnie V Lyngdoh u dkhot katei ka komiti u la ong ba kam don kano kano ka jingkhang lad ban pyndep ia ka kad liengsuin, “Ngi kwah ban pynthikna ba dei ban siew sha ki trai jaka da ka dor kaba biang” ong u bah Ronnie u MLA ka Mylliem konstitwensi.
Ka PAC ka la ong ba ka kwah ruh ban tip ia ka kyrteng ki ophisar kiba donkti ha ka por ba pyllait ia ka pisa sha ki trai jaka , katkum ka jingong jong u u la ong ba ki la don 14 ngut ki trai jaka bad hadien ba la pynshisha ki don tang 6 ngut kiba la shah klun ei ka jaka jong ki hynrei kitei ki 6 ngut haduh mynta kim pat ioh ia ka bai jaka kum ka bai lutksan. Hynrei u la ong ba ki don ar ngut ki trai jaka kaba ka jaka jong ki ka la tam ia ka shi klur hynrei laai pynban ha kiwei pat ki briew.
Phi don ban ong eiei?