Shillong:Ka KHNAM Youth Wing, ha kane ka kynti, ka la khynra halor ka rukom thung kam thung jam ha ka North East Institute of Ayurveda and Homeopathy (NEIAH) bad ha ka jingtohkit jong ka KHNAM, ka wad jingshai halor ka jingthung kam lane ia kito kiba la jied bad ki bym pat thung, ha katei ka tnat jong ka sorkar India, kaba la pynbna paidbah ha u snem 2015.
Shuh shuh ka KHNAM, ka pyn kynmaw ia U Director ka NEIAH, ia ka jingkren halor katei ka phang, ha kaba ula iathuh ba ia ka eksamin, kaba la pynlong ha u snem 2016 na bynta ki kam bapher, yn hap ban pynduh noh, lyngba ka hukum jong ka sorkar India, katba ha kajuh ka por, la iathuh ba la thung ia ki kiba bun ki kam, kum ki Staff Nurse, ki Dietician, katba ki don ruh kiwei pat kiba la pynlong eksamin biang.
Ka KHNAM, ka ujor namarkata ba katei ka jingleh, ka dei ka jingpynkhein ia ka kyndon jong ka riti synshar ri, katba kum ka artikel 16, kaba kren shai ia ka jing ai bhah mar katjuh ha ka thungkam thungjam ha ki ophis sorkar bad ka KHNAM, ka kynnoh ba kane ka jingleh jong ka NEIAH, ka dei kaba kam lah satia ban shah, namar ba ka khanglad ia kiba bun ki samla khlem kam ha ka Jylla bad la ong ruh ba ka jing pynialeh eksamin biang, ka thew ban wan kit da ki briew kiba nabar, ba kin ioh trei ia kitei ki kam, kiba ki briew kiba na ka Jylla, ki lah ban trei.
Ka KHNAM, ka dawa namarkata ba lada jia ba ka NEIAH, kam leh kyrkieh ia katei ka kam, kumta ka seng, kan hap ban ujor sha ki pulit pyrshah ia U Director ka NEIAH, namar ba ula pynkhein ia ka riti synshar ri jong ka Ri India bad ha kajuh ka por, ka KHNAM ka kren shai ba kan khanglad ia ka jingpynlong interbiw biang, ha ka 23tarik Nailar 2018 bad dei tad, ynda haba la ai ia ka bhah kaba kyrpang ia ki trai shnong ka Jylla bad ka KHNAM, kan sa ailad ia katei ka eksamin, ong ka kyrwoh na U bah Thomas Passah, President, KHNAM State Youth Wing.