Byrngem ka HYC ban thoh sha u Lat, ia ka VAB

Shillong, 8 Jylliew:
Ka HYC ka la ong ba ka Village Administration Bill ba la pass da ka KHADC ka dei ka bym don bniat bad kam lah ban batai ia kiba kumno ki briew lah ban ai serti phiket jaka shong jaka sah, hynrei kan wanrah jingma pynban ia ka jait bynriew. Katei ka seng ka la byrngem ba kan sa shong jingialang biang ban thoh jingkyrpad sha u Lat ba u dei ban sangeh ka jingai mynjur ia ka VAB ba la pass ka KHADC.
“Kane ka jingbym ler ka VAB ba mynta kan pynshlur ia ki bar jylla ban ia khun hapoh ing bishar lada ym don ba ai serti phiket jaka shong jaka sah ia ki, kaba la ban pynngat pynban ia ki Rangbah Shnong hapoh ka ain” ong u President ka HYc u bah Peter J Lawai haba kren sha ki nong thohkhubor mynta ka sngi. “Ka KHADC ka la weng noh ia ka sub section 8 bad 16 jong ka section 5 kaba la batai ba ki bym dei khasi kim lah ban ioh sertiphiket lymda ki la shong la sah ha ka shnong ym duna ia ka 14 snem” u la ong biang. Ka HYC ka la kynnoh ba ka PDF ba ialam da ka seng Congress ka dei ka kynhun kaba ia shah ia ki bar jylla da kaba ki weng noh ia ki ar tylli kitei ki kyndon.
“Ka VAB ba la dep pynkylla ka long kumba la ai lad pynban ia ki bar jylla bad ka pynap jingma pynban ia ki trai muluk, ngi pynrem ia ka PDF ia katei ka jingbym kitkhlieh jong ki ia ka jaitbynriew” ong u bah Robertjune Kharjahrin, General Secretary ka HYC. U la ong ba ka KHADC bad ka sorkar jylla ka la kam ba ba ka sub section 16 jong ka section 5 ka ia tyngkhuh bad ki ain ba la don lypa u la ong ba ka article 19 ka riti synshar ka ri India ka la ong ba ka sorkar bad ki District Council ki lah ban thaw ain ban iada kyrpang ia ka jaitbynriew jong ki ban lait na ka jingwan ryng kyrthep ki mynder. U la ong ba ia katei ka kam lah ban batai tang da ka ain ym da ka sorkar jylla lane ka District Council.
Ka HYC ka la kynnoh ruh ba ka PDF ka la pass ia ka Bil khlem ka jingkynjoh ktien na ki seng sain pyrthei, ki sengbhalang bad ki Khlieh nongsynshar shnong, “Ngi dawa ba ka PDF ka dei ban bah khlieh ban pynrung biang ia kitei ki ar tylli ki kyndon hapoh katei ka bill” ong biang u bah Robert. “Ngi la pynkynmaw ia ka KHADC ba ka VAB kam dei tang ban ai sertiphiket hynrei ka dei ban long kaba lah ban iada ia ka jaitbynriew” ong u bah Peter uba la ong biang ba ka VAB ba mynshuwa ka dei kaba kwah da ka HYC ym kaba mynta.