Byrngem ka HNLC, ban pynkut ia ka jingiadei U Khasi bad U Garo

Shillong, 13 Nohprah:
Ki riew sain pyrthei na Garo Hills, dei kiba pynkha ia ki seng kieng atiar, ong ka HNLC. Ka HNLC, ka maham ruh ba ka jingiadei jong u paidlang Khasi bad ki Garo, kan sa kut noh, lada kine ki seng kieng atiar, ki pyni bor ia ki briew jongngi ha Ri Khasi.
Ha ka jingpynmih khubor da katei ka seng kaikhlaw, lyngba U bah Sainkupar Nongtraw, ka la kren shai ba ka jing kharoi ki seng kiengatiar ha ri lum Garo ka dei lyngba ki riew sain pyrthei Garo, kiba pyn kha ia kine ki seng.
Ka HNLC, ka kynnoh ba ka jingshakri jong ki ka dei beit ia ki riew sain pyrthei, ym ia ka dawbah ba ki ieng.
Ka jingshah rahbor,jingshah dawa pisa jong ki paid 7trep ha ki sengkiengatiar ka dei ka kam kaba ngi kum ki paid 7trep ngi hap ban shimkhia.Ym tangba kine ki seng ki pyndik ia ki paradoh parasnam jongngi ha ki thaiñ khawpud, hynrei ki mut ban pynkylla syndon iaka jylla Meghalaya kum ka Jylla Bihar. Wat kane ka sorkar ba la ialam da u Dr.Mukul Sangma, ka don kajuh ka rukom pyrkhat kum ki sengkieng atiar ha Garo. Ka seng ka kren bynniaw ruh halor ka jingsahteng ban pynmih ia ka kaiphod jong ka sorkar, halor ka jingshah siat ki 2ngut ki paradoh parasnam baluilui ha Mookhep. Ka HNLC ka kyrshan iaka jingdawa ka KSU na SWKH ban pyllait mardor ia u paradoh parasnam jong ngi khlem kano kano ka jingdawa pisa ne pynmynsaw. Ka Seng kan nym don jingkitkhlieh lada ka jingiadei hapdeng ki paid 7trep bad ki paid Garo kan kutnoh lada kine ki sengkieng atiar ki pynibor ia ki riewpaidbah ka jaidbynriew jong ngi. “Kane ka jingleh jong ki kam dei ka kam kaba dang thymmai” ong katei ka seng bad ka la ong shuh shuh ba kine ki seng kim dei ban treikam hapoh u pud u sam ka bri u 7trep kata ha ki thaiñ Borsora ne Shahlang ne ha kino kino ki bynta ka khyndew ka shyiap jongngi, kin hap ban burom ia kane,namar ka HNLC kam shym tampud sha ka khyndew jong ki bad kam shym la pynmong ia kino kino ki paid Garo ne ban ktah ia ki riewpaidbah baluilui jong ki parajait jong ki. “Hynrei lada kine ki seng ki kwah ban iatreikam halor ka kput, ngi long kiba la khreh tangba wat pynbor pat iangi ban rahbor kumjuh ia ki Garo jong ki” pynkut ka kyrwoh na U bah Sainkupar Nongtraw.