Shillong, 14 Naitung:
Ka Dorbar kiba khraw batri ka Hima Mylliem kaba la long mynta ka sngi ha iing Dorbar ka ophis u Syiem ka hima Mylliem ha Mawkhar, Shillong ka la pyrshah jur ia ka jing pynkylla Law Adong ka KHADC ia ka khlaw ka Hima kaba don ha Lum Mawpat. Ha katei ka Dorbar la wan ban ia shim bynta da baroh ki myntri, ki basan bad ki bakhraw batri ka Hima Mylliem bad la pyniaid ia ka Dorbar da u Syiem khyn nah u Pa’iem Thwelson Manik Syiem, namar ka jingbym poi Dorbar u Syiem u Pa’iem Latho Manik Syiem naba u don hapdeng ka jingshitom.
Katei ka Dorbar ka la ieng pyrshah ia ka jingpynkylla ‘Law Adong noh ka KHADC ia katei ka khlaw, namar ba ka la ieng ha ka nongrim ba ka hima kam don jingtip eiei, hynrei la leit ban soi soskular tang da ki ar ngut ki myntri u myntri K Langstieh bad u myntri M.B Kharlukhi ha ryngkat u Syiem ka hima Mylliem. Hynrei u Syiem khynnah u la ong ba kitei ki ar ngut ki myntri ki la kubur hapoh ka iing dorbar ha ka 2 tarik u jylliew 2014 ba ki la leh bakla bad ki la shim ruh ia ka rai ban weng noh ia katei ka jingiasoi kular jong ki ha ka por ba dang long CEM u bah Ardent M Basaiawmoit, ha kaba ki la phah da ka jingthoh sha u CEM bad ba ka Dorbar ruh ka la phah da ka jingthoh sha ka KHADC ba kam don jingtip eiei ia katei ka kam.
U Myntri ka Hima Nongkhlaw u bah J.Nongkhlaw u la ong ba naduh ba la phah ia katei ka jingthoh ka Hima Mylliem kam khih kam ksar shuh, namar ki la nangmut ba ka KHADC ka la sngap ia ka jingpyrshah ka hima, hynrei ka daw ba la pynlong ia ki ban khih ka dei hadien ba ka hima ka la ioh jingthoh na ka KHADC dang ha kine ki khyndiat ba ka KHADC, ka kwah ban leit jurip noh ia katei ka jaka ryngkat ka Hima Mylliem, khnang ban ioh pynieng mawpud noh bad katei ka jingthoh na ka KHADC, ka pynkyndit biang thret ia ka Hima Mylliem bad ka la lum Dorbar kyrkieh ban pyrshah ia katei ka kam. Lah ban pynkynmaw ba-ar ngut ki myntri ka hima Mylliem ryngkat bad u Syiem ki la panmap na ka Dorbar kiba khraw ha u snem ba la dep bad ki la kubur ba ki la leh bakla eh da kaba leit ban ia soi khlem ka jingtip ka hima bad ha kajuh ka por ha u 2014 ki la phah ruh da ka jingthoh sha ka KHADC ba ki la weng noh ia ka jingiasoi kular, hynrei mynta ka sngi hapoh Dorbar ruh kitei ar ngut ki la shah takrain biang bad kumba la leh ha u snem ba la dep ki la pan map biang na ka dorbar bad kiba khraw ki la map ia ki bad mynta ka Hima Mylliem ka la ieng tylli da kawei ka sur ka sur ban pyrshah beit ia ka KHADC ban pynkylla ‘Law Adong ia ka Law Lum Mawpat.
Phi don ban ong eiei?