Byrngem ka GSU ban ialap elekshon pyrshah ia ka Congress

Shillong, 22 K’lyngkot:
Ka Garo Students’ Union – Western Zone- (GSU-WZ) ka la byrngem ban pynlong ka jingialap paidbah pyrshah ia ki kyrtong ka Congress ha kane ka elekshon jong ka Garo Hills Autonomous District Council (GHADC) ban long shen.
Ia kane ka rai la shim hadien ba ka GHADC ka ailad ia u bar jylla ban long u nongiasaid ain jong ka GHADC.
U President ka GSU-WZ u Jappindro M Marak u la ong,” Ngi la rai ban pynlong ia ka jing ialang paidbah ha baroh ki District bad ki Konsti wensi ban pynshai ia ki paidbah ba kim dei ban kyrshan ia u Kyrtong Congress ha kane ka elekshon MDC ban long shen”.
U la ong ba ka seng kam pyrshah ia ki nongiasaid ain bar jylla hynrei ka sngewkhia ia ka hok trai jaka trai muluk bad ia kane ka kam iasaid ain dei ban thung da ki trai jaka ha ka GHADC ym da ki bar jylla.
Ka jingbym lah ka GHADC ban weng ia u nonniasaid ain bar jylla, ka pynlong ia ka GSU ban kynnoh ba u chief executive member (CEM) bad baroh ki MDCs jong ka GHADC ka Congress kim pat tip ia ka jingmut jong ka Sixth Schedule.
U Marak u la kynthoh ba u CEM u tieng ban weng ia u nongiasaid ain bar jylla namar ka pyni ba u CEM u la shah pyniaid hapoh utei u bar jylla.