Shillong:Da ka Public Interest Litigation (PIL) ha khmat ka ingbishar byrngem ka Federation of Khasi Jaintia Garo People (FKJGP) Upper Shillong hadien ba ym i don dak ban pyndep siang rong ia ka surok rong ha Mawnianglah-Mawkhan-Mawrashe.
Ka seng ka la leit ban jurip biang ia kane ka surok ha ka jingialam u samla Kitboklang Nongphlang, President ryngkat ki nongialam na lai tylli ki Unit ka seng ba kynthup ia ka Mawnianglah,Mawkhan bad Mawrashe Unit ba la synran lang da u bah Elton Cliff Warjri, President ka FKJGP East Khasi Hills.Kane ka jingbyrngem ka seng ka la long, hadien ka jingwan jurip biang ia kane ka surok ha ka sngi saitjain ba dang shu dep bad ha ka sngi nyngkong ka seng ka la leit ban ia kynduh ia u bah DM Pyngrope, Executive Engineer PWD NH By-Pass Division ha ophis treikam jong u ban pan jing-pynshai halor kane ka surok.
Kane ka jingjurip kaba ar jong ka seng ia kane surok ha ka shnong Mawnianglah, Mawkhan bad Mawrashe la lap ba ka la long kaba la i sangsot, namar dang shen ka PWD ka la kam ba ka la pynbha ia ka surok phewse la shu theh bad pyndap da ka khyndew. Kane ka la wanrah jingeh mynta ia ki paidbah kine ki shnong khamtam ki khynnah skul kiba iaid lynti na kane ka surok man la ka sngi.Ha u snem ba la dep ka FKJGP hadien ka jing-pynlong ia ka jingjurip lang bad ki ophisar na ka tnad PWD, hynrei ka jingleh kyllut kane ka ka tnad ka la pynlong ia ka seng ban leit moramot ia kane ka surok dalade hi. “Na ka liang Executive Engineer u la kular ban phah ophisar ban phah pynbha shipor ia kane ka surok katba ki dang ap ia ka skhim kaba dang pynkhreh ban siang rong ia ka”, la ong u samla Kitboklang Nongphlang.
U samla Kitboklang Nongphlang u la ong ba kum ka seng kan ap shipor la ka sorkar kan phai khmat shisha ne em ban leh da ka kam. “Namar wat hadien ba u MLA ka thaiñ, u Bah Hamletson Dohling, u la dep kular dang shen ha khmat ki nongialam shnong kine ki lai shnong ban siang bha noh ia kane ka surok ha ka ophis treikam jong u ha Lummawbah dang shen pynban ka dang don ha ka jing-pynkhreh ia ka mang tyngka,lada ka tnad kam leh eiei ia kane ka surok, ngin ym banse ban shim da kawei pat ka sien jam wat ban ujor Public Interest Legitation (PIL) ha khmat ka ing kashari ba don burom”, u la ong shuh shuh bad u la bynrap, “Ka seng kan bud dien ia ka jingpyn-khreh ia ka mang tyngka na ka bynta ban shna ia ka surok katkum ki kot ki sla kiba ka seng kan lum jingtip”.
Phi don ban ong eiei?