Ka China, ka maham ba kan khie noh ka thma bah ba lai bad kata ka long, da kaba kan hiar thma ia ka Taiwan, lada jia ba katei ka Ri, ka pyneh, ban pyn ia tylli bad ka dew bah China. Katei ka jingkren jong ka China, ka dei ha shwa jong ka jing rakhe jong ka Taiwan, ia ka sngi jong katei ka Ri, lane kaba ki tip kum ka National Day, kaba long mynta ka sngi.
Ka khubor jong ka Global Times, ka byrngem ba ka America, kan mad ia ka jing ia tyngkhuh kaba jubor bha, namar ba ka leit buh shipai bad ai jing iada ia ka Taiwan bad la byrngem ban pyniap shwa ia ki shipai jong ka America, kiba don ha katei ka Ri, ha ka jing hiar thma ka China sha katei ka dew lynnong.
La ong shuh shuh ba ki nong ialam Taiwan, ki lah ban pyndem noh ha kine ki khyndiat snem ban sa wan, lane kham kloi ia kata, lane lada jia ba kim leh kumta, ka China, kan knieh da ka bor.
Ka Beijing, ka ju shim, ba ka Taiwan, ka dei ka jylla jong ka China; katba ka Taiwan, ka shim, ba katei ka dei ka Ri, kaba laitluid bad kaba synshar dalade hi.
Hynnin ka sngi, U President Xi Jinping jong ka China, u kren shai, ia ka jing ia tylli, kaba da ka jing ia suk mynsiem, hynrei ha kajuh ka por, u maham ba katei ka jingthmu, kan sa urlong noh shen.
Naduh ka sngi thohdieng ba ladep, ki la don 150 tylli ki liengsuin iapom jong ka China, kiba la leit rung sha ka haw haw jong ka Taiwan bad ha ka Lah Sngi U Blei ba ladep, ki don 56 tylli ki liengsuin iapom, kiba leit rung sha Taiwan, kaba pyni ia ka jing pynkhein jong ka China, ia ka synshar laitluid jong ka Taiwan.
Phi don ban ong eiei?