Shillong,7Nailar:
Ki saw tylli ki seng bhalang na East Jaintia Hills District, kiba kynthup ia ka KSU-KC, AJYWO-EJZ, FKJGP-KC bad ka HNYF-EJZ, ki la kynnoh ba ka sorkar jylla ka la shu thok ia ki paidbah Jaintia da kaba kam ba kan pynsah ia ki shipai BSF tang 6 bnai ha Khliehriat hynrei mynta la dap shi snem pura naduh u 2012, ym pat iohi dak eiei ba ki shipai BSF kin mih na katei ka jaka, hynrei la nang I skhem shuh shuh pynban kat nangmih ki sngi.
Namar katei ka jingshah thok ha ka sorkar jylla ki saw seng ki la byrthen ba lada ka sorkar kam sngap ia ki jingdawa ba jai jai jong ki ban weng noh ia katei ka ktem BSF na Khliehriat kin shim da ki lynti ia khih kiba tyngeh.
“Ka Khliehriat ka nongbah jong ka EJHD kam dei ka jaka khappud, ka dang jngai da ki spah kilometre na ki jaka khappud. Kumta ngi pyr shah jur halor ka jingpyn kylla ktem shipai (BSF Camp) ka sorkar jylla ia kawei ka jaka jong u paid bah (PWD Land) ha Khliehriat nalor ba kane ka jingshong jingsah jong ki BSF ha katei ka jaka kam don jingmut satia kat kum ka kamram kaba ka sorkar pdeng ka la mang na ka bynta ki shipai BSF” ong u Bah Cherity S Suja, General Secretary ka KSU Khliehriat Circle.
Shuh shuh kitei ki saw seng ki la pynpaw ba ka jingshna ktem BSF ha Khliehriat kam don jingmut eiei, kumta halor katei ka mat ki seng shen ki sa leit ban ia kynduh ia ka Myntri ka kam pohing ka kong Roshan Warjri ban pynsngew ia kane ha ka bad lada ka jingiakren kam seisoh ka kyrwoh na ka seng ka la ong ba kan shim ia ka rai iakhih kaba tyngeh.
Phi don ban ong eiei?