Byrngem ïakhih ka AHAM, lada pynkylla ïa ka bhah kam bhah jam

Shillong:Ka A·chik Holistic Awakening Movement (AHAM) kum ka seng kaba ïeng ban ïakhun ïa ka bam sap bad ki rukom treikam ki bym ai ïa ka hok kiba long ka jingma ïa ki jingdon ki kolshor naduh ki longshwa manshwa jong ki jaitbynriew garo ne A·chik, ka kwah ban ïeng ban pynrem ïa ki jaitkam bad ki sur kiba pyrshang ban wanrah isih jaitbynriew kaba ai lynti ruh ïa ki jingpyrshah Ri bad ki kam sniew ha imlang sahlang tang na ka myntoi shimet ki katto katne ki riew shimet.

Ki jingpyntieng saiñ pyrthei bad ki jingkynthoh kiba long jingma ïa ka suk ka saiñ jong ka jylla dei ban weng bad ka seng ka kyrpad namar kata ïa ka sorkar jylla ba mynta bym dei ban pynsngewbha ïa kino kino ki jingkynthoh ban pyndam noh ïa ki rukom treikam kiba la pynneh haduh ba dap 50 snem ka jingïoh jylla lajong.

Ka seng ka ong ba kan ïai bteng ban ïeng pdeng ne bym dei ban tuklar (status quo) haba ïadei bad ka bhah kam bhah jam kaba lah don ha ka jingmynjur hadien ba la ïoh ïa ka jylla na ki laingut ki shipara riewlum jong ka jylla bad ka kwah ban ai burom ïa ki riew ïaleh ban pynïoh jylla kiba la rai na ka bynta ka bha ka miat jong ki briew ka jylla.

Ki rukom treikam kiba la thoh, la pyntreikam bad kiba la shon muhor dei ban ïakhun hapoh ka kyrdan synshar paidbah ka riti dustur ka Ri India kaba la pynïoh ban ïa kaba ha ki surok kaba yn wanrah tang ïa ki jingpynthut ïa ka shongsuk shongsaiñ ki jaitbynriew jong ka jylla.
Ka seng ka kyrpad ïa ki briew balui lui kiba kwah ban ïakhun ïa ka jingbym hok na ka bynta ki nongshong shnong ban ïeng ym na ka bynta ka myntoi shimet jong ki hynrei na ka bynta ki kam ban ïakhun ïa ka jingduk, ki bamsap, jingbym hok bad kiwei, ban ïa kaba kawang ïa ki kam ki ban wanrah jingeh ïa ka shongsuk shongsaiñ ha ka jylla.
Ka seng ka kwah ban pynbna ïa ki paidbah Garo ba ka sorkar jylla kam pat pyntreikam ïa ka rai ban pynlong Dorbar Tlang bad ka Additional Secretariat ha Tura, kaba la don hapdeng ka jingmynjur naduh ba la ïoh ïa ka jylla bad ka kwah ba kane ka sorkar kan sngewthuh ïa ka jingmynjur kaba lah 50 snem mynshwa, ha kaba ka sorkar jong ka jylla kan treikam 6 bnai na Tura bad 6 bnai na Shillong.
Ka seng kan sa pynlong shen ïa ka jingïalap soi paidbah halor ka kam Dorbar Tlang bad ka Additional Secretariat ha Tura bad pynlong jingïalang bad jingpyrshah jingïakhih kiba bun ha ki sngi ban wan, ong ka kyrwoh khubor ba la pynlait da u Georgeprince Ch. Momin President AHAM CEB,HQ.Tura.