Byrngem ia khih biang ki nongtrei jong ka EMRI 108

Shillong: Ki nongtrei jong ka EMRI 108 hapoh ka Meghalaya EMRI worker Union, mynta ka sngi ki la wan ban pynbna ban ia khih biang, namar ka jing kuman ia ka GVK EMRI bad ka Sorkar Jylla ha ka ba ki la kular ban pynbeit ia ki jingeh jong ki hapdeng ar bnai hynrei ki khlem pynurlong bad ka por ba ki ai ar bnai ka la kut noh hynnin ka sngi ka 22tarik.

Haba ia kren bad ki nong pathai khubor, u nongialam ka Meghalaya EMRI Worker Union u bah Roypar Khar raswai u la ia thuh ba mynta ka kynti kan long kum ka jingmaham ba na ka liang ka seng kan sa shim ia ka da ka lynti jingiakhih kaba tyngeh, namar ba kam i don kano kano ka jing kit khlieh na ka liang ka GVK ne na ka liang ka Sorkar.

Ka Meghalaya EMRI worker Union ka lashim ia kane ka rai, hadien ba na ka liang ka GVK bad ka Sorkar ka la kular ban pynbeit ia ki jingeh jong ki nongtrei EMRI hapoh ar bnai, hynrei kat haduh mynta na ka liang ka GVK ne na ka liang ka Sorkar ruh kim pat lah ban leh ei ei, hynrei na ka liang ka GVK, ka la nion shuh shuh ia ki nongtrei da ka ba ka la khate ia ka tulop jong ki ka ba arbnai.