Bynshet ka UDP ha ki MDC ban bteng ne em bad ka KHUDA

Shillong, 6 Naiwieng:
U Working president ka UDP u Bah Paul Lyngdoh u la iathuh ba ki nongkitkam ba kham rang bah jong ka seng bad saw ngut ki MDC ka KHADC, ki la bynshet ba kin pule bniah shwa ia ka jinglong jingman ka sain pyrthei ha KHADC.
Haba kren hadien ba la wai ka jingialang mynta ka sngi Balang, u Bah Paul u la ong ba ki nong kitkam ba kham rangbah lem bad ki MDC kin shim ia ka rai ba khad duh la kin bteng ne em ban iatreilang bad ka shatri KHUDA ba la ialam da ka seng Congress ha KHADC.
U la iathuh ba u nongialam jong ka Parliamentary Party ka UDP ha KHADC u Bah Remington Pyngrope un sa ai ia ka kaiphod halor ka jinglong jingman ha KHADC sha ki nongialam ka party. “U nongialam ka PP um lah ban wan ha ka jingialang namar ba ki don ki daw shimet. Ki lai ngut ki MDC kiba don ha ka jingialang ki la ai ia ka jingmut jongki halor ban bteng ia ka jingkyrshan ia ka EC ba la ialam da ka Congress ha ka Council”, la ong u nongaitktien ka UDP.
U la kyntait ba ka UDP ka don hapdeng ka jingiapher jingmut halor ka ILP ha ka dorbar jong ka KHADC kaba dang shu long shen ha kaba ki don ki MDC ba kyrshang bad ki don kiba pyrshah.
“Lehse, ka don ka jingbym sngewthuh jingmut hapdeng jongki” u la ong. Lah ban kdew ba ha ka resolution ba la wanrah halor ka ILP ha KHADC, ar ngut ki MDC ka UDP u Bah Tistosstarwell Chyne bad u Bah Embhah Syiemlieh ki kyrshan katba ar ngut u Bah Remington Pyngrope (u Deputy CEM) bad u Bah Teinwell Dkhar (Executive Member) ki pyrshah.