Bynnud ki tnat sorkar Jylla, ban pynbna iar ia ki jingtip ba donkam

Shillong: Kine ki dei ki sngi kiba eh shibun, ha kaba ki lad jingtip, ki dei kiba donkam bha ia u paidlang ka Ri Khasi Jaintia bad ka Jylla hi baroh kawei, hynrei kaba lyngngoh shi katdei, ka long ba ki tnat sorkar, ki ai jingtip ia ki jingtip kiba donkam bad kiba dei ia u paidlang ka Ri Khasi, uba don ha ka jylla bad shabar, da kaba bthah ia ka tnat pathai khubor ka Jylla (information and public relations) ban ai ia kum kitei ki jingtip sha iwei ne ar tylli ki kotkhubor.

Katei ka dei ka jingleh bym salia bad bym khein kor jongki, ia la ka jong ka kam lane lehse ba ki bynnud ban pynlut pisa, na ka bhah jong ka sorkar, ban pynbna iar ia kiba donkam ha ka jingplie ki dukan, ka jingplie ia ki iew ki hat, ka jingplie ia ka leit ka wan ki kali bad kumta ter ter bad ka dei ruh katei ka jingleh bym salia jong ki tnat sorkar, ba ka sa mih ka jingshah bat, shah dain kuna jong ki kali kiba iaid kali, namar ba kim sngewthuh shai ia ki kyndon jong ka sorkar.

Kawei na kitei ki hukum, kaba pyni ia ka jingleh torti, ka dei kaba la pynmih da ka tnat ka kit ka bah jong ka sorkar Jylla, kaba iadei bad ka jing shim wai taksi ia ki nongleit nongwan sha kad rel ne sha kad liengsuin bad ha ka point kaba phra, la thoh sha ka tnat Information and Public Relations, ba kan ai jing pynbna tang sha kawei ka kotkhubor Khasi, kawei kot khubor phareng bad sha kawei ka kotkhubor Garo. Katei ka pyni ba kitei kiba donkam ban leit jingleit, ki dei beit kiba pule tang ia kitei ki lai tylli ki kotkhubor ba kim dei kiba pule ia ki phew tylli ki kotkhubor, kiba la pynmih na Shillong.

Ka long ruh kaba lyngngoh ba haduh mynta, ba ka sorkar Jylla, kam shym la ithuh ne pyndonkam ia ki online news portal, kiba la ithuh da ka tnat Information and Public Relations, Meghalaya, Shillong, kiba la pule da ki lak ki ngut ki paidbah kiba don ha satlak pyrthei bad lehse, kiba donkam eh ha kane ka por ia ki jingtip jong ka sorkar Jylla bad ki bym ioh satia, lyngba ki kotkhubor. [La thoh da U bah RM Shabong, President Meghalaya Editors & Publishers Association (MEPA)].