Bynniaw U CEM KHADC, ba khang sah ia ka iewduh

Shillong: U Chief Executive Member jong ka Khasi Hills Autonamous District Council u bah Titostarwell Chyne mynta ka sngi u la lum ia ka jingialang ia ki nongkhaii jhur jong baroh ki thain kiba hap hapoh ka jingpeit jong ka council ban iamir jingmut halor ki jing shah ktah ha ka pakhang shnong, kaba la neh 40 sngi ha kane ka jylla.

Haba ia kren bad ki lad pathai khubor u CEM ka KHADC, u la iathuh ba namar ka lockdown ka la wan rah ia ka jing duhnong kaba khraw ia ki nongkhaii bad ia ki nongrep jong kane ka jylla bad nangta sa ka jingkhang ia ka ki iew ki baheh tam ha ri khasi khamtam ka Iewduh ka la ktah ia ki kamai kajih ia ki nongkhaii bad ki nongrep ba kim ioh ban pynmih ia ki mar rep jong ki.

U la ong ruh ba ki ba bun ki nongkhaii ki ju thied ia ki jhur ban khaii shabar, hynrei na ka jing pakhang shnong, mynta um iaid iew shabar bad ki iewshnong ki duna ka jingiaid iew ia ki mar rep ha ka ba ki nongrep ki hap ban die tad ia ki marrep jong ki ha ka ba ka la ktah bha ia ka ioh ka kot ki nongrep.

Ka jingialang mynta ka sngi ka long ban ia mir jingmut bad ki nongkhaii ki ba ju thied ia u mar rep ban shalan sha bar bad da kwei ka rai ki la rai ka long ban kyrpat ia ka sorkar jylla ban shah noh ban plie ia ka iew dielang ha iewduh .

U la ong ruh ba wat la ka sorkar ka la plie ha baroh ki jaka, ia ki iewdielang hynrei na ka jing bym don ia ka kudam kaba biang ka wan rah jing eh ia ki nongkhaii ki ba ju thied ia ki mar rep.

Ki la buh ruh ka jingkyrpad ba lada ki shah ban plie ia ka iew kan long kat kum ki kyndon ba hap ban bud katta tang katto katne ngut ki ban ioh ban wan ha ka ne ka iewdie lang bad ban ym don ka jing ia lang paitbah ha ka ba ki briew ki ban wan kin thied ia ki mar rep bad pynkit noh ia ki mar rep da ki kali ban pynkit ia ki mar rep. U la buh ruh ka jingkyrpad ba ka sorkar ka dei ban thaw ia ki lad ki lynti khnang ba kin lah ban pynpoi ia ki marrep sha kito ki jylla ki ba marjan ki ba ju shim ia ki marrep jong ki sha kiwei ki jylla.

Ha kaba iadei bad ka jingeh jong ki nongrep sying, u la ong ba u sying u dei uwei na ki marrep uba bun tam ha ki thain Ribhoi u la kyntu ia ka sorkar ba ki dei ban ai lad ia ki iewdie lang ba ki thain Ri Bhoi kum ha Bhoilumbong bad Umsning khnang ba kin ioh ban pyniaid iew ia u ne u marrep namar ba lada kim lah ban pyniaid iew ha kane ka por kan ktah ia ki nongrep syieng. U la kyrpad ruh ka sorkar ka dei ban thaw ia ki lad ki lynti ban pyniaid iew ia ki marrep jong ka thain Riwar kum u Kwai u tymmpew u synsar u sohmrit khlaw. Ki la dawa ruh ba ha man ka iewdie lang ka sorkar, ka dei ban pynbiang ia ki kudam khnang ban lait na ka jingduhnong ki nongrep.