Jowai: Ka Khasi Students’ Union, Jowai Circle mynta ka sngi ka la khang tala ia ka State Bank of India kaba don ha Phramer ia kaba la tip ruh kum ka SBI Mynso Branch, West Jaintia Hills.
Kane ka jingkhang tala ia katei ka bank ka la long hadien ba ka KSU Jowai Circle ka la ioh ia ki jingujor na ki paidbah kiba buh pisa ha katei ka bank naduh ka kor ban update ia ki Pass Book haduh ka kor ATM ban sei pisa.
Ka KSU ka la iathuh ba hashwa ban shim ia kane ka rai ban khang tala noh ia katei ka bank ka la long hadien ba u Branch Manager katei ka Bank um patiaw satia ia ka shithi ba la phah sha u ban dawa ba dei ban pynbiang ia ka kor ban Update ia ki Passbook bad ruh ban pyntreikam ia ka kor ATM kaba don ha katei ka Bank.
“Ngi la dep ban thoh sha u Branch Manager ban ai poi shibnai ban pynbiang ia ki jingdonkam ki paidbah, hynrei wat hadien ar bnai ruh ka rukom treikam katei ka bank ka dang long kaba dkhoh bad utei u Branch Manager um patiaw satia ia ka shithi ba la phah da ka seng”, la ong u President ka Jowai Circle, u Ioanis Suchiang.
Phi don ban ong eiei?