Jowai: U heh ka Megha Goods Gargos uba dei u Power of Attorney 2019-20 u la ujor ejahar pyrshah ia u heh duh ka Goldstone Cement Ltd uba dei u Managing Director, u Vishal Jain halor ka jingbym siew shuh ia ka bai nong kit ban shallan ia ka Dewbilat, Clinker bad Fly-ashes sha ki jaka bapher bapher kylleng ka jylla khamtam hapoh ka thain Shatei Lam Mihngi.
Katkum ka jingujor utei u heh jong ka Megha Goods Gargos, u SK Rai u la kynnoh ba katei ka Company kam shym la siew ia ka pisa kaba la kot haduh T. 23.92 Lakh kaba dei ka bai nong kit kaba naduh u bnai April une u snem.
“Katei ka Goldstone Cement Ltd, kaba don ka don ha Moo- Sianglamare, East Jaintia Hills kam shym la treh shuh ban siew ia katei ka pisa wat hadien ba la pynkynmaw ba la bun bun sien la ong u Rai ha ka jingujor jong u.
U la bynrap ruh ba ka jingbym treh shuh katei ka Company pynmih Dewbilat ban siew ia katei ka pisa ka ktah shi katdei eh ha ka ban pyniaid shakhmat ia ka kam jong ka Megha-Goods Gargos khamtam ha kaba iadei bad ka jingsiew sha ki driver kiba da ki spah ngut.
U la kynnoh shuh ba ka jingleh katei ka Kharkhana Dewbilat ka long ka kam thok kam shukor bad ka jingthmu ban klun ei ia ka hok jong kito kiba iatreilang bad katei ka Company.
U SK Rai u la kyntu ia ki pulit ka Lumshnong PS ban kem ia utei u heh ka Goldstone Cement Ltd bad ban register mukotduma pyrshah ia u katkum ka ain.
Phi don ban ong eiei?