Shillong, 14 Naitung:
Ki paidbah ka Rambrai konstitwensi ki la rai ban leit kiew noh ha ka iinglieh iingsaw ka Megha laya High Court ban pan ia ka rai kaba shai halor ka jingpynslem ka sorkar ban pynlong ia ka elek shon MDC shiteng samoi la jan dap shi snem ba la sah thylli kane ka kam bad ruh ka jingshah iuhroit jong ki paidbah naduh ba kim don MDC shuh mynta la phra bnai eiei.
Wat la ka sorkar jylla ka la sted bha ban phah risain ia ki MDC kiba bat kam MLA hynrei ka suki pat ban pynlong ia ka elekshon kaba la jan dap pura shi snem naduh ba ki MDC ka KHADC bad JHADC ba la bat lang kum ki MLA, ki la risain ha u bnai Risaw mynshem snem.
Haba iakren bad u Bah Champion Paliar u nongialam ka paidbah Rambrai konstitwensi, u la iathuh hynne ka sngi ba ki paidbah ka Rambrai kila shong jingialang bunsien ha kine ki bnai naduh ba ki la shah pynduh MDC noh ha ka sorkar naduh mynshem snem ha kaba ki skhim pynroi na ka MDC, kim ju wan poi shuh sha ka konstitwensi.
“Ngi la ia rai ba ngin leit kiew noh sha ka Kashari High Court ban dawa ia ka hok jong ki paidbah naduh ki skhim MDC, ki jingbym lah ban pynlong elekshon MDC shiteng samoi bad khamtam ka jingshah iuhroit jong ki paidbah ka konstitwensi”, la ong u Bah Paliar.
“Ha kane ka taiew hi,ngin sa ujor noh da ka Public Interest Litigation (PIL) ha ka High Court Meghalaya”, la ong u Bah Paliar.
U la ong ba naduh ba la shah pynduh MDC, ka thain ka la iakynduh jingeh bha namar ba ki kam pynroi ba dei ban wan na u MDC kim ju poi shuh.
U la ong ban tip ia ka jingshisha, u Bah Paliar u la ong ba ka kynhun jong ki riew rangbah ka thain ki la ialum lang khrui ban iapyrkhat bad ki la rai ban pan jingtip na ka RTI na ka ophis ka District Council Affairs (DCA) halor balei ka sorkar ka pynslem ban pynlong elekshon, ka jingbym ioh skhim MDC shuh naduh ba risain u MDC.
Hynrei kaba lyngngoh ka long ba ha ka RTI, ka sorkar kam lah satia ban jubab balei kam lah ban pynlong elekshon MDC shiteng samoi, bad kam lah ruh la ki konstitwensi ki bym don MDC ki ioh skhim MDC ne em.
“Baroh ki jubab ka sorkar ki long kiba thamula suda ha kaba kam lah satia ban jubab ia ki jingkylli”, la ong u Bah Paliar.
Hadien ba la ioh ia ka jingtip na ka RTI, na ka liang jong ki paidbah ka Rambrai, ki la iashong jingialang ban iapyrkhat ban iaid shakhmat bad ki la shim ban leit tied jingkhang noh na ka Kashari High Court ban ioh ia ka jingbishar hok halor kane ka jingiakynduh jingeh jong ki paidbah ka konstitwensin.
Ka Rambrai ka la sah khlem don MDC naduh u bnai Risaw mynshem snem haba u MDC jongka u Bah KP Pangiang lem bad kiwei pat ki 6 ngut ki MDC ki la risain noh namar ka jingpas ka sorkar ia ka ain khang bat ark am.
U Bah Paliar u la iathuh ba ki paidbah ka Rambrai ki la iashong pyrkhat bha ia kane bun bnai shwa ban shim ia kane ka rai kaba khadduh. “Ngi la dep ai por ia ka sorkar ba kan ai jingshai hapoh shi bnai bad ban pynlong elekshon MDC shiteng samoi hynrei sngewsih ka long ba kam lah ban ai jubab bad namarkata, ki paidbah kim banse ban shim da kane ka lynti hadien ba ki la mad ia ki jingsyllang na ka jingshah iuhroit”, la ong u Bah Paliar.
Lah ban kdew ba kham mynshwa u Bah KP Pangiang ka Rambrai u la iehnoh ia kam MDC hadien ba ka sorkar ka la pdiang ia ka ain khang bat ark am ka Prevention of Disqualification (Members of the Legislative Assembly of Meghalaya) Act, 2015 ha u bnai Nailur mynshem snem.
Hynrei ha ka jingiakren dang shen, u Bah Pangiang u la ong ba um sngew babe ia ka jingrisain MDC namar ba um dei ba u leh hi hynrei ba la shah leh jubor ha ka sorkar jylla.
Ka jingkhih pyrshah ki MDC ba la risain ka la mih hadien ba u Lat ka jylla u la pynksan ia u CEM ka KHADC u Bah Pynshngain N Syiem, ba ka ka district council kam hap ha kti ka sorkar. U Bah Pynshngain marwei um shym la risain satia na ka kam MDC bad u la iakhun haduh ba u Lat ka jylla u la pynksan ia u katkum ka jingai jingmut ka Election Commission of India.
Namar ka jingsheptieng ioh shah mait kyrteng 7 ngut ki MDC ba bat MLA ki la risain MDC kynthup u Bah HDR Lyngdoh ( Congress) uba long ruh u Myntri ka tnat District Council Affairs ( DCA), Bah Metbah Lyngdoh ( UDP), Bah H. B. Nongsiej ( UDP), Bah Ardent Miller Basaiawmoit ( HSPDP), Bah KP Pangniang ( HSPDP), Bah Sanbor Shullai ( NCP) baroh hynriew ngut ki dei jong ka KHADC bad u Bah Stephason Mukhim ( Independent) jong ka JHADC.
Phi don ban ong eiei?