Nongpoh: Haba pynpaw ia ka jingsngewkhia halor ka jingbym shimkhia da u Kontraktor ban pyndep ia ki surok kaba u dei ban pyntrei, hynne ki nongialam ka Seng Federation of Khasi Jaintia and Garo People, North Khasi Hills District, ki la leit ban iakynduh ia u Executive Engineer ka PWD Nongpoh Division, na ka bynta ban pynpaw ia ka jingpyrshah halor katei ka jingbymshimkhia da utei u Kontraktor, ha kaba ki la dawa syndon na utei u EE ka PWD ba u dei ban weng noh syndon ia katei ka Work Order kaba la ai ban pyntrei sha utei u Kontraktor.
Ka daw kaba la pynlong ia kitei ki nongialam ka FKJGP ban leit kynduh ia u EE ka PWD, ka dei hadien ba ki la lap ba utei u Kontraktor um shem la lah ban pyndep ia 2 tylli ki surok, kiba u dei ban pyntrei bad kita ki kynthup ia ka surok na ophis DC kaba mih sha Sajer Nongpoh bad kawei pat ka dei ka surok na Umdap sha Shakoikuna.
Haba kren sha ki Nongthohkhubor, u Bah Luistar Lyngdoh, General Secretary ka FKJGP, u la ong ba kaba la pynlong ia ka seng ba kan leit ujor sha utei u EE ka PWD, ka hadien ba ki la ioh ia shibun ki jingujor na ki paidbah jong ki shnong kiba pyndonkam ia kitei ki surok, namar tang na ka daw ka jingpynslem da utei u Kontraktor ban shna ia kitei ki surok, ka pynlong ia ki paidbah ba kin shem ia shibun ki jingjynjar ha ka leit ka wan.
Namarkata, na ka bynta ka jingmyntoi jong ki paidbah bad khnang ba kitei ki surok kin dep kloi, na ka liang ka FKJGP, ka kyntu ia utei u EE ka PWD ba u dei ban pynduh noh ia ka Work Order jong utei u Kontraktor, da kaba ai noh sha kiwei pat ki Kontraktor kiba lah ban pyntrei stet ia ka kam bad ban pyndep kloi, khnang ba kan wanrah jingmyntoi ia ki paidbah, bynrap u Bah Luistar Lyndoh.
Ha kajuh ruh ka por, ka FKJGP ka la pynsngew ruh halor ka jingslem ban pyntrei ia ka surok kaba don ha shnong Baridua, kaba ki paidbah hi ki shem jingeh namar ka jingsniew ba palat pud u surok, hynrei haba iadei bad katei ka surok ha Baridua, na ka liang utei u EE ka PWD, u la ong ba ia katei ka surok yn sa siang rong noh shen.
Phi don ban ong eiei?