Bym lah pyndap nalade, hap bam ia ka doh ksew ruh: Deborah

Shillong, 15’lyngkot:
Haba kren kum ka kongsan ha ka jingialang kaba la long ha ka U SosoTham Auditorium, ba la pynlong da ka tnad Animal Veterinary & Husbandry ka sorkar jylla, kaba long ruh ka jingpyni nam pylleng jong katei ka tnad, ka myntri ba dei peit ia katei ka tnad ka Deborah C Marak ka la ong ba ha u snem 2013-2014 ka jylla ka la pynmih haduh 1049 lak tylli ki pylleng, bad 822 lak litar ka dud, hynrei katei ka jing pynmih dud bad ka jing pynmih pylleng kam pat lah ban pyndap ia ka jingbun paid u paidbah ka jylla bad dang hap ban shim ia kitei ki mar na kiwei pat ki jylla.
Ka la ong ba ka jylla Meghalaya ka dei ruh ka jylla kaba khlain bam doh, bad katkum ka jingbuh jingkhein ka sorkar ka la ong ba uwei u briew u bam doh haduh 35.27 kram marwei ha ka shisngi, 75 kram ka dud marwei u briew u dih ha ka shisngi katba 35 tylli ka pylleng u bam marwei ha ka shisnem. Ka la ong ba ka jylla kam lah ban pyndap doh tang nalade hi ia ki paidbah bad hap ban shim na kiwei pat ki jylla. “Ka jingbym lah ban pynmih doh nalade hi katkum ka jingdawa ka jylla ka pynlong ruh ia ki briew ban bam da ki doh ksew” ong ka Deborah.
U bah Kennedy Khyriem pat uba dei u parliamentary Secretary katei ka tnad uba la long kum u symbud kongsan u la ong ba ha ka shisnem ka jylla ka thied doh 35 hajar metric ton na bar, namar ba ka jylla kam lah pyndap dalade hi, ka pyleng ruh u la ong ba hap ban ap na kiwei pat ki jylla ban pyndap ia ngi, bad bun na ki sniang ot doh u la ong ba hap ban thied na Bihar, u la ong ba donkam ban pyrshang ban pynmih dalade hi. Ha kane ka iew, ki don kumba 30 tam ki dukan ba shu shna bad la die bun jait ki mar kum ka jingbam sniang, ki jingbam syiar, ki syiar khun, ki syiar kha pylleng, ki mar rep bad ki tiar pynkhuid syiar bad kiwei de ba la wan iashim bynta ki nongrep.
Ia kane ka iew la pynlong kum shi bynta na ka prokram ka tamasa 100 Sngi jong ka sorkar jylla. Ha kane ka sngi ka Iatyllilang Milk Producers Co-operative Society na Nongpyiur ka la ai ia ka jingrwai pdiang sngewbha ia baroh. Kiwei kiba kren ha kane ka sngi ki kynthup ia u Bah Kennedy C. Khyriem u Parliamentary Secretary ka tnad ri jingri, u Dr. Nanchan u Director ka ICAR, Dr. Arnab Sen, Principal Scientist, ICAR, Dr. J. S. Jyrwa ka Director, AH and Veterinary Department bad kiwei de.