Bym ioh result 9 ngut ki khynnah thoh Matrik na Patharkhmah Govt. HSS, kynduh nonghikai ki KSU

Nongpoh: Haba shimkhia ia ka jingujor da ki 9 ngut ki khynnah thok Matrik jong ka Patharkhmah Govt. Higher Secondary School, kiba la ujor sha ka seng halor ka jingbym ioh ia ka Result Matrik, wat haba ki la pyndep ban leit thoh ia ka Secondary School Leaving Certificate, mynta ka sngi ki nongialam ka KSU Western Ri Bhoi, ki la leit ban wad jingtip na ki nonghikai jong katei ka skul, khnang ba kin tip ia ka jingshisha ba balei kitei ki khynnah kim ioh ia ka result wat haba ki la pyndep ban thoh ia ka exam.

Ia katei ka kam ban leit kynduh ia ki nonghikai jong katei ka skul, la ialam da u samla Receive Pator President ka KSU Western, Ri Bhoi lem bad ki nongialam shnong jong katei ka thain, kumta haba ki la leit ban wad jingtip na ki nonghikai jong katei ka skul, ki la ioh jingtip, ba ka daw kaba la pynlong ia kitei ki khynnah ba kim ioh ia ka result, ka dei namar ka jingbakla da uwei u nonghikai uba la shim ia ka subjek Tourism hapoh katei ka skul.

Haba pynshai halor katei ka jingbakla, u samla Bah Receive Pator, u la ong ba katkum ka jubab ba ki nongïalam seng ki la ioh na katei ka skul, ka long ba ka daw halor ka jingbym ioh result kitei ki khynnah ka dei na ka daw ka internal marks, ha kaba u nonghikai uba la shim ia ka subject Tourism, u la bakla ha ka rukom ai marks, namar ia ka internal marks kaba dei 20 ka Full Marks bad 6 ka Pass Marks, hynrei utei u nonghikai, u la kum ai bakla bad kata ka long ba u la ai palat ia ka 20 Marks, ia kaba lehse na katei ka daw kaba la pynlong ia kitei ki khynnah ba kin ym ioh result. Namarkata, haba kitei ki nongialam ka KSU ki la lap ia katei ka jingbakla da utei u nonghikai, na ka liang ka seng ka la kyntu ba ki bor pynïaid skul ki dei ban shim ka jingkitkhlieh ban pynioh result ïa kitei ki 9 ngut ki samla pule hapoh kine ki khyndait sngi, khnang ba kan ym ktah ia ka lawei jong kitei ki khynnah, kiba la lynga mynsiem tang namar ka jingbakla da utei u nonghikai.