“Bym ioh jinghikai, tieng ki samla ban seng kam”

Shillong, 12 Naitung:  
Ka myntri ba peit ia ka tnad bylla, ka kong Ampareen Lyngdoh ka la ong ba ka jingbym ioh ia ka jinghikai kaba biang, ka la pynlong dieng pyng kiang ia ki samla ban seng ia ki kam ki jam lajong.
Haba kren ha ka jingialang ba la pynlong ha Main Secretariat ba la pynlong na ka bynta ban seng kam seng jam ha kane ka sngi Saitjain, ka Kong Lyngdoh ka la ong ba donkam ia ka jingkylla bad kane ka dei ka jingkylla ka dei ban sdang ban ai mynsiem na ki kmie ki kpa na iing na sem.
“Ban pynkiew ia ka jingioh jinghikai, ka long kaba donkam ai ia ka jinghikai kaban ioh jingmyntoi khambun. Ka jingthmu ka long ban btin lynti ia ki samla ban long kiba lah ban ieng ha la kajong ka kjat lyngba ka jingstad bad ka jingtbit ba ki la ioh”,  ka la ong. Ka sorkar Meghalaya bad ka Asian Development Bank (ADB) ryngkat Japan Fund for Poverty Reduction ki la seng ia ka, ‘Supporting Human Capital Development in Meghalaya’ (SHCDM) ban hikai kam ia ki samla kane ka jylla.
Kane ka SHCDM project ka thmu ban ai jinghikai ha ki saw tylli ki jait kam kynthup ia ka ITI ha Rynjah, Jowai, Williamnagar bad Baghmara ban pynbha ia kine ki jait kam.
Haduh 16 tylli ki jait kam kin ai jinghikai ha kine ki ITI. Ha kane ka workshop la don lang u Dr. Jemimo Mawthoh, MLA, Bah Titus Chyne, MLA bad 30 ngut ki nongmihkhmat na ki tnad sorkar bapher bapher, ki samla wad kam bad kiwei kynthup u Principal Secretary u M. S. Rao u la pyniaid ia ka jingialang.