Nongpoh: Ka kynhun ki nongtrei Casual ha Nongpoh Civil Hospital, ki la byrngem ban sangeh noh ka jingtrei kam hapoh katei ka Hospital, kata hadien ba ki la shah lehbein palat ha ka sorkar, namar mynta la 8 bnai kynthih kim shym la ioh shuh ia ka bainong kaba ki la leit trei ha katei ka Hospital.
Ha ka kyrwoh kaba ki la phah sha ki lad pathaikhubor, ki la kdew ba kin sdang ia katei ka jingsangeh treikam jong ki naduh ka 1 tarik u Nailar, ha kaba ki nongrim kaba la pynlong ia ki ba kin shim ia katei ka sienjam ka dei namar jingbym patiaw ka sorkar ban siew ia ka bainong sha kitei baroh ki nongtrei Casual.
Ki la kdew ruh, ba dang shen ka sorkar ka la pyllait ia ka bainong trei sha kitei ki Casual tang shi bnai tam, hynrei katei kaba la pyllait da ka sorkar kam shem la lah ban iarap ei ei ruh ia ki, namar ki iakynduh jingeh shaba palat bad khamtam eh ha kaba kum kane ka por, ba hiran ka pyrthei.
Ki da kdew ruh ba katei ka rai ban sangeh treikam na katei ka Hospital, ka dei ba kitei ki nongtrei Casual kin ioh ban wadlad wad lynti, na ka bynta ban trei bylla noh shawei, khnang ba kin lah ban pyndap ia ki jingdonkam ia ka iing ka sem bad ki khun ki kti, ba kin lait na ka jingiap thngan ha kaba kum kane ka saw ka sian ba baroh ki dang iakhun ia ka khlam COVID-19.
Phi don ban ong eiei?