Shillong:U Vice President ka People Democratic Front (PDF) u bah James Ban Basaiawmoit, u la mih noh na ka seng, hadien ba um sngew iahap ia ka rai jong ka Central Executive Committee (CEC) ban leit iasoh sha ka NPP shen.
Haba kren mynta ka sngi, u bah Ban uba dei u MDC barim ka Mawkhar u la ong, “Mynta ka sngi, nga la aiti ia ka shithi iehnoh seng ha u President ka seng bah Gavin M Mylliem, hadien ba nga la tip bad sngewthuh shai ba ka CEC kaba ngam lah ban poi hynnin ka sngi, ka la rai ban pyndam noh ia ka PDF ban leit rung sha kawei pat ka seng. Ngam kwah ban dei uwei ban khylliap ne ban pynlip noh ia u mombati, te ka bha ban ngan mih noh na kane ka parti”.
U la ong ba ha u shimet, u sngew tynnad bha ia ki seng trai ri ban kren ia ki mat jong ka jaitbynriew hynrei kam i poi shano shano. “Nga dei u briew ba sngew tynnad bha ha ki seng riewlum, ha ka por ba thaw ia ka PDF, ngi la iaid shakhmat ban kren ia ki mat ka jaitbynriew hynrei i kumba kam poi shano shano, bad sa kine ki MLA ki la ong ba kim lah bor shuh, te haba ym lah bort e, yn leh shuh kumno”.
U la ong ba ki paidbah ki sngewngiah noh ia ki seng trai na kane ka daw bad ia mynta un sah shwa marwei ban ym leit lang sha ka NPP bad un sa shim rai hadien. “Ngi don ar ngut ki MLA, haba kine ki la pyndem bym lah shuh ban pyniaid ia ka parti, te nga marwei kam long kaba suk, MLA, MDC ruh ym don, ka shem jingeh ban pynneh ia ka parti”, la ong u bah Ban.
Na bynta jong u, u bah Ban u la ong ba un iashong jingialang ia ki nongialam, ki nongkyrshan bad hadien ba la ioh ia ka jingai jingmut jongki, un sa shim ia ka rai kaba bha tam.
Halor ka jingkylli balei ym leit lang sha ka NPP, u bah Ban u la ong, “Ngi la iohi, ka pyrthei ka la iohi hi, ngan iathuh iaphi, dei na kane ka daw, ka jaitbynriew ka la iohi bad dei na kane ka daw ka la pyllong ia nga ban ym lah ban leit lang sha ka NPP”.
Nga ruh nga dei u nong kyrshan jong ka pdf mawphlang constituency baroh kila mynjur ban leit nga marwei te em ngam treh ban leit npp.