Bym don pisa, jynjar ban buh nongpahara ha man ki ophis

Shillong, 19 Nailur:
Ki ophis ka sorkar jylla bad sorkar pdeng ki shem jingeh ban buh nongpahara dalade hi namar ka jingjiran ka pisa ka tyngka bad dei na kane ka daw, ki hap ban shu ai wai noh ha ki nongpahara shimet.
Katkum ka jingong u Myntri tnad kam pohiing u Bah HDR Lyngdoh, ki ophis sorkar ki shem jingeh ban buh nongap pahara ha man ki ophis namar ba hiran pisa bad namar kane ka daw, ki hap ban shu ai wai noh sha ki agency ne ki kynhun ba pyniaid ia kane ka kam.
Haduh mynta, ki don 32 tylli ki Security Agency kiba treikam ha kane ka jylla bad na kine, ki don 2256 ngut ki samla ba la iohkam ha kane ka jait kam, la ong u myntri.
Kine ki nongap ophis ki leh ia ka bynta ban peit, ban phikir bad kiwei ki kam ba la bynshet ia ki bad ka jingai wai ha kum kine ki kynhun, kala long ruh kum ka jingpynmih kam bad ka jingai kam ia ki briew, la ong u Myntri.
Katkum ka jingtip, ka tnad Home Guard ka jylla kaba ju dei ka kamram jongka, ban phah pahara ha ki ophis sorkar kam don briew satia ban bynshet ia kane ka kam bad kawei pat ka dei namar ba ka tnad sorkar kam don pisa ban siew tulop ia ki.
Ka jingpynap da ki pulit Home Guard ki long tang ha ki jaka sah ba jong ki heh ki hain kum ha iing sah u Myntri Rangbah, ki myntri sorkar bad ki ophisar ba kham heh.