“Bym don pisa, hap iaid suki ban phiah ia ka DE na ka PHE”

Shillong, 20 Nailur:
U Myntri ka tnad Khlaw ka jylla u Bah Prestone Tynsong u la ong ba ka jingthmu ban pyn iakhlad noh ia ka Directorate of Environment (DE) na ka tnad PHE hap iaid suki namar ba ka sorkar kam don pisa.
“Ka jinghiran pisa ka sorkar jylla, ka la pynlong ban hap iaid suki noh ban pyniakhlad ia kine ki tnad. Ngi la tip ba ka jylla ka la iakynduh jingeh namar ka jingkyr duh pisa hadien ba ka jylla ka la shah khang tih ia u dewiong”, la ong u bah Tynsong.
Katkum ka jingong u Myntri khlaw, ka sorkar kam lah ban shna ia kane ka tnad ia mynta namar ba ka donkam pisa shibun ban siew ia ka tulop jong ki nongtrei nalor ki jingdonkam ha ki ophis.
U la ong ba ka jing donkam ka jrong bha namar ba ia ka  Direc torate ba thymmai yn kynthup lang ia ka Meghalaya State Pollution Control Board (MPSCB) bad katto katne ki bynta ba hap ha ka PHE bad ka tnad khlaw.
Hadien ba la thaw ia ka directorate ki jingdonkam ban ioh bor kiba iadei bad ka mariang, kin hap thoh sha kane ka tnad Environment Directorate .
U Bah Tynsong u la ong ba ka directorate kan iatreilang ruh bad ka tnad Mining and Geology, Industries bad ka Forest department.
U la iathuh ba baroh ki tnad ki la eksamin ia kane ka jingthmu bad shen yn pynlong kam hadien ba la ioh pisa ka sorkar.
Lah ban kdew ba ia kane ka jingiakhlad ia ka DE na ka PHE la pdiang da ka kynhun myntri ha u Jylliew 2012.