Bym don doktor ha Umkiang PHC, wad dawai na Assam

Shillong, 10 Nailur:
Ka jingbym don doc tor ha ka jaka sumar Primary Health Centre (PHC) ha Umkiang ka la wanrah jingeh shibun ia ki paidbah khamtam kiba duk bad duna ka ioh jing kot. Namar ka jing bym don doktor ha kane ka jaka sumar ki paidbah kim banse ban leit wad dawai haduh Assam bad Shil long.
“La lai sngi kynthih nga la leit wad dawai na Umkiang PHC namar ba i pang I khun ba dang 11 snem, hynrei baroh 3 sngi ym don doctor don tang kawei ka nos” la ong u bah Wanbor Bareh uba dei u nongniah kali kamai na katei ka thaiñ sha Shillong.
Une u rangbah u la pynpaw ia ka jingsngewdiaw halor ka jingbym don dawai ha katei ka jaka sumar bad u la iathuh ba um banse ban leit wad dawai noh sha Assam namar bym don doctor ha kane ka jaka sumar kaba dei ban ai jingshakri ia ki paidbah thaiñ nongkyndong kiba don kumba 15 shnong ei ei ha kitei ki jaka ba marjan.
Naduh ki por ba kham mynshuwa ruh ki paidbah ki la ujor halor ka jingbym biang ki doctor ha kane ka jaka sumar bad haduh mynta ruh ki paidbah ki dang mad ia ka juh ka jingeh bym don doctor.
Lah ban kdew hangne ba ha u snem 2009 ka sorkar Meghalaya ka la iasoi ia ka jingiateh kular bad ka Akhil Bharatiya Kishan Kalyan Samity (ABKKS)kaba dei na Silchar Assam ba kan pyniaid ia kane ka jaka sumar bad ka jingthmu jong ka sorkar ka long ban ai ka jingshakri kaba khambha ia ki paidbah, hynrei hadien ka jingiasoi soskular bad kane ka seng ruh ym shym la lah satia ban pynbiang doctor.